`Etita,

`Oku faka`au tama ke takataka nenefu `etau samená he ngaahi me`a `oku hokó pea mo e ngaahi lafo ave loloa `oku ma`alifekina mai mei he kau `atama`ia mei mulí.

`Oku hange kiate au `oku fu`u vave fau `a e takai `a e Tu`ipelehaké ia `i mulí kae `ikai ke talitali mu`a ke nau toki me`a fakataha mai mo e toenga `o e Komití. Ko e founga ha`oha`omu`a tatau pe `eni na`á ne fai `i hono kamata ke fokotu`u `a e komiti ko `ení `i he Fale Aleá pea mo hono fakahoko ki He`ene `Afió. Hiliange iá na`e `i ai `a e ngaahi ta`e femahino`aki ia `i he me`a na`e mokoi ki ai `a e Tama Tu`í mo e me`a na`e fakamafola `e he `eiki nopelé.

Ko e matu`utamaki pea mo e matamama `o e komiti `a `Akilisi Pohiva pea mo Clive Edwards ko hono fakamu`omu`a ko ia `ena fakakaukaú mo ia `o e tokosi`í kae `ikai ke fekumi ki he fakakaukau pea mo e loto `o e tokolahi `o e kakaí. Ko e me`a ko `eni `oku feinga `a e komiti `a e Fale Alea ke fakahokó ko e me`a ia na`e totonu ke tomu`a fai `e he kau Temó.

Ko e toe me`a `e taha `oku mahu`inga `i heni ko e founga ko ia `e fai ai `a e fekumi ki he loto `o e kakaí. `Oku hange kiate aú ko e `uhinga na`e `omai ai `a Toketa Sitiveni Halapuá koe`uhi ko `ene ngaahi taukei `i he founga "Talanoa" na`á ne hanga `o fokotu`utu`u mo ne ngaue `aki mai `aki `i he ngaahi ta`u lahi. `Oku totonu ke ki`i taimi hifo `a e Komiti ke nau ngaue fakataha pea mo Halapua.

`I he`ene pehe leva ko e tefito`i fatongia `o e komiti ko `ení ko `enau fanongo ki he kakaí ki honau le`ó pea nau toki vakai`i leva mei ai pe te nau faka`uhinga`i fefe `a e loto `o e kakaí. Ko hono mo`oní, `oku `ikai ke tau mahu`inga`ia kitautolu he loto mo e fakakaukau `a e kau memipa `o e komití ka ko `enau fakama`opo`opo ko ia `a e loto `o e kakaí.

`Oku `osi mahino `aupito `a e loto ia `o `Akilisi pea mo Clive Edwards pea `e tatau aipe pe ko e ha `a e me`a `e talaatu `e he kakaí `i he ngaahi fakataha ko ia `oku `amanaki ke fakahokó, kuo `osi mahino hona loto `o naua ia. Ko e lelei taha leva ma`ae feinga ko ia ke mahino `a e loto `o e kakaí, `e lelei ange ki he komiti ia ke tuku kinaua ki tu`a koe`uhi kae lele `i matangi `a e ngaué.

Faka`osí, `oku fu`u hoha`a tama `a e lafo mai homau ni`ihi mei muli. Mou kataki ka tau ki`i mamalie hifo! `Okú ou ki`i meimei ongo`i ia `e au `okú mou mamahi kimoutolu `o hange `oku mou pehe na`e totonu ke mou kau he komití. Tau faitohi pe kitautolu ki he `Etitá, pea `ai mo e tohí ke toe ki`i nounou ange! Kapau `okú mou fie kau mo`oni, pea tuku `a muli ka mou foki ki Tonga `o hopo ki he mala`é!

Kuo mau toe favaia`ia kimautolu he matafuhú, kae `osi ko iá ka tala atu ke tui `a e letá kuo ke toe kole fakamolemole mai koe!

Seuke, teu toki hoko atu!

`Ofa-ki-Tonga