'Etita,

Malo mu'a e ngaue lahi hono fakakakato mai e ngaahi ongoongo mei hotau ki'i motu 'oku tau 'ofa kotoa ai.

Ko e ki'i fakahoha'a ko 'eni 'oku tu'unga pe he hanga hifo ki he fakamatala moe fakamanamana 'a e kau faiako 'o e ngaahi 'apiako 'a e Fonua. 'Oku ou ngaue atu 'aki 'a e 'apiako 'a e fonua he neongo hono ngaue'aki e 'apiako 'a e Pule'anga ka ko e fakakatoa pe ia 'o Tonga katoa.

Ko e vahenga 'o e kau faiako ko 'eni 'oku launga mo fakamanamana tokua te nau tukungaue kapau he 'ikai fai honau loto', 'oku ma'u ia mei he ngaahi tukuhau 'a e fakafo'ituitui 'o Tonga fakakatoa. Ko e me'a faka'ulia mo'oni ko e fa'ahinga fakakaukau kuo 'asi mai 'i he kau faiako ko'eni, 'a e pehe tokua 'oku nau sai ange pea ta'e fakapotopoto hono 'ave kinautolu ki he ngaahi feitu'u ma'ulalo tokua ki honau tu'unga fakaako. 'Oku ou kole keu hufanga he ngaahi fakatapu kae lafo atu e ki'i fakakaukau ko 'enii na'a 'aonga atu ki he kau faiako ko 'eni 'oku ha mai 'enau launga.

Ko e tu'unga fakafaiako 'oku tatau pe 'a e feitu'u masiva mo ma'ulalao mo e feitu'u 'oku koloa'ia 'i he 'ete hoko ko e faiako. Ko e me'a 'oku ako'i ki he masiva ko ia pe 'oku ako'i ki he kolo'ia'. Ko e lau 1 2 3 4 5 6 7 8 9 10 na'e ako'i he taimi 'o Tupou 'Uluaki ko ia pe 'oku ako'i 'aki 'a Tonga he lolotonga. 'Oku te'eki ke ako'i 'e ha Filosefa ha ki'i tamasi'i 'o liliu ke lanu hinehina e lanu 'uli'uli'. Ko ia ai kapau 'oku filifili feitu'u 'a e kau faiako ko 'eni ko e vete'anga lelei taha ko hono tuku e fa'ahinga ko 'eni ki tu'a ka e 'omai e fanau na'e toki 'osi mai he ta'u kuo'osi ke nau faiako.

'Oku ou kole atu ke tuku mu'a e sio fakatu'utu'unga he ko e 1+1=2 he 'iki toe lava ia 'o liliu ke 1+1=3, ko ia ai 'oku totonu ke tu'u 'o ngaue pea ka 'ikai pea alu ki 'uta 'o too ha fu'u manioke na'a ngali 'aonga ange ia kae tuku mu'a hono paa'usi'i e fonua mo e fanau 'a e kakai 'oku ngaue mateaki ke langa e fonua. Kuo fu'u lahi e ngaue'aki e Temokalati pea kuo lele tavale holo e kakai he taki taha kumi 'ene totonu ka e fua 'e he kakai ngaue hono kanongatamaki.

'Ofa pe 'e a'onga atu e ki'i fakakaukau ko'eni ki he feinga 'a e kau faiako 'oku fai fakahinohino ki ai e PSA.

Malo

Siosaia Moimoiangaha

Lalo 'Ovava, Neiafu, Vava'u

siatahi [at] yahoo [dot] com">siatahi [at] yahoo [dot] com [2]