'Etita,

Kuo mahino ta'etoe veiveiua 'a e taumu'a ngaue 'a e kau ma'u mafai ko'eni hono feinga'i ke fakangata ta'efakalao 'a e faifatongia 'a Chris Kelley mei hono lakanga. Ko e fa'ahinga kakai fakatu'utamaki 'aupito 'eni he 'oku 'ikai ke nau ufi atu kiha taha, 'osi 'ete tumu 'a e toki hu mai 'a e minisita polisi ni mo e palopalema lahi faka'ulia, ta 'oku toki mahino mai koia na'a ne tekemu'a ke fakangata 'a e fai fatongia 'a Chris Kelly tupunga mei he'ene fisi'ia hono fakalea'i 'ene maumau'i 'a e lao he ta mali 'ikai ke tu'o taha pe ka na'e toe taufale'i tu'o 2. Pea koe fu'u me'a mahino 'a e tokolahi e kau tekemui he me'a ni. Minisita 'oku ke kau koe he faifaitaki'anga kovi kihe kakai 'o e fonua 'o ma'ave'ave ai pe tokua ko e kau Tonga ko hono nau faiva hono ta mo tuki honau 'ofa'anga 'o hange ha la'i holoholo'anga.

Ko e ki'i palopalema 'oku hoko lahi hotau fonua ko e mofisi mo e fie'eiki ta'efielea'i neongo ha'ane kikivoi ha fo'i me'a 'oku hala. Ko e vave pe kihe fakapo'uli 'o ha mahino mai ai ko e si'isi'i 'a e kataki mo e 'ilo. 'Ikai ko 'enau ilifia he motu'a papalangi 'oku 'ikai ke toe afe 'ene faitotonu mo muimui ki he lao? Kohai ha taha tene lava fai me'a ne lava 'ehe palangi ko'eni? Hu ki Falealea 'o 'omai kau kakaa ke fai ki ai 'a e ngaue 'a e lao kiate kinautolu. Kole tokoni ki NZ ke nau tokoni mai ki hono kumi si'i fa'ahinga ne mole he 'Asika. Tokoni ki he fakalakalaka 'a e potungaue Polisi, holo hifo mo e tu'unga fai hia pehe ki he tokanga ki he ngaahi launga 'oku fai ange kihe 'apitanga polisi. 'Ikai ngata ai ne fakapa'anga 'a e polokalama ko'eni 'aki 'a e $4 miliona ko e feinga pe kihe fakalakalaka mo toe leleiange 'a e fakahokongaue 'a e potungaue ni.

Sio ki he 'enau ta'eufi 'ikai ke nau toe fie hoko atu konituleki 'a e palangi kae ngaue'aki pa'anga tokoni ne ha'u mo e palangi ke fai'aki e ngaue?. Mou hange tofu pe ko e kau kilia 'i he toko hongofulu ne ma'a honau kili, 'ikai ha hounga mo toka'i 'a e mana kuo fai ki he 'enau mo'ui. Ko e polokalama ne ha'u moe palangi ko e mana ia ki hotau fonua kaikehe 'e ilifia tatau pe kau faka'uli konaa he toe faka'uli he 'oku 'I ai 'a e me'a ke tesi'aki 'e he kau polisi pe koeha lahi 'o e 'olokaholo honau sino ke fai ha ngaue ki ai, 'o tatau mo e kau fai hala 'I he Falealea 'o Tonga 'a ee 'oku 'ikai ke nau makataki'i ke ue'i kinautolu 'e he lao.

Neongo ne 'ikai ke 'afio'i 'e he 'ene 'Afio 'a e ngaue kovi ko'eni ne fai, 'oku 'I ai 'a e faka'amu ke toe foki mai 'a Chris Kelley ki Tonga ke faka'osi e polokalama ne ha'u ai ke lava lelei.

Tau fakatauange ke hounga kiate kitautolu ha fietokoni ha fonua pe koha taha ki ha founga 'e toe leleiange mo nonga 'a hotau fonua.

Tu'a 'Ofa 'Eiki Atu.

Lou 'Uhila

louuhila [at] gmail [dot] com