You are here

Sponsored advertising content

Ko e ngaahi fiema'u 'a e kakai ki ha mo‘ui ‘oku lelei ange

Nuku'alofa, Tonga

Posted by the Embassy of the People’s Republic of China to the Kingdom of Tonga

Ko e konga ‘o e lea tefito ‘i he fepōtalanoa‘aki ‘a e Paati Kominiusi ‘a Siainá mo e ngaahi paati politikale ‘a māmaní ‘i he fakataha mā‘olunga na‘e fai.

Hangē pē ko ia ko e fakalea ‘o e kaveinga, ko e ‘uhinga ‘o ha komiunitī fakaemāmani lahi ‘oku nau ma‘u ‘a e kaha‘u tatau, ko e kaha‘u ‘o e pule‘anga mo e fonua kōtoa pē ‘oku pau ke nau fema‘utaki. ‘Oku tau ‘i he vaka tatau pē, pea ‘oku tonu ke tau fepikitaki, vahevahe ‘a e leleí mo e mamahi, feinga ke langa hotau palanité ke hoko ko e fāmili pe ‘e taha, pea liliu e faka‘amu ‘a e kakaí ki ha mo‘ui ‘oku lelei ange, ke hoko ‘o mo‘oni.

‘Oku totonu ke tau feinga ke langa ha māmani ‘oku malu mei he ilifiá. Ko e tupu māmālie ‘a e sivilaise ‘a e tangatá ‘oku ne fakahā, neongo ‘etau holiholivale ki ha melino ‘oku tolonga ‘i ha ta‘u ‘e lauiafe, ko e taú ‘oku ‘ikai pē mama‘o pea ‘oku ne hanga pē ‘o fakailifia‘i kitautolu. Koe‘uhí ko ha‘a tangata ‘oku nofo ‘i he palanite pē ‘e taha, ‘oku ‘ikai totonu ki ha fonua ke malu ia ‘i he malumalu ‘o e faingata‘a‘ia ‘a ha fonua kehe. Ko e fakamanamana ki ha fonua ‘e taha, ‘e lava pē ia ke hoko ko e pole ki ho fonua. Ko e ngāue fakapālataha pe tui kuikui ki hono ngāue‘aki e fakamālohi, ‘oku ‘ikai ko ha tali ia ki he lahi ange mo e fakahoko e ngaahi founga kehekehe ‘o e ngaahi fakamanamaná ki he malu ‘o ha fonua.

‘I he tafa‘aki ‘e taha, ‘oku totonu ke tau ohi mai ha fakafuofua ‘oku fo‘ou mo angamāheni mo kitautolu, ‘okapau ‘oku tau fiema‘u ha malu ‘oku aofaki, fekau‘aki mo tolonga; pea ‘oku totonu ke tau ngāue fakataha ke fokotu‘u ha palani fo‘ou ‘oku malu, angatonu, totonu pea ‘aonga ki he tokotaha kōtoa. ‘Oku totonu ke tau kau fakataha ‘i hono to‘o ‘a e ngaahi tefito‘i ‘uhinga ‘o e tau, ka tau kakapa atu kiate kinautolu na‘e uēsia ‘i he tau, mo malu‘i e kakai fefiné mo e fānaú mei he ngaahi tautea ‘o e tau, kae ulo mai e hūelo ‘o e melinó ki hotau kelekele, pea ko e tokotaha kōtoa pē ‘e nofo ‘i he melino mo e nonga.

‘Oku totonu ke tau feinga ke langa ha māmani ‘oku tu‘umālie mo hao mei he masiva. Neongo ko e fakalakalaka ‘i he naunau mo e tekinolosia ‘i he māmani ‘o e ‘ahó ni, kuo a‘u ki he lēvolo na‘e ‘ikai misi ki ai ‘a e to‘utangata ki mu‘a, ka ‘oku kei ui pē ko e fakalakalaka ‘oku ‘ikai palanisi mo ta‘efe‘unga. ‘Oku lahi ‘aupito ‘a e fu‘u vanu ‘i he fakalakalaka ‘i he vā ‘o e Tokelaú mo e Tonga; ko e masivá mo e fiekaiá ‘oku kei mafola lahi ‘aupito; ‘oku kei ‘i ai ‘a e kehekehe ‘i he tekinolosia; pea ko e kakai ‘i he ngaahi fonua lahi ‘oku nau kei nofo pē ‘i he mo‘ui masivá mo e māmahi lahi. Kapau te ke muimui ki he fakakaukau fakamolitonga ko ia ‘oku ‘ave ‘e he ikuná e me‘a kōtoa, pe ko e mo‘ui kole-ki he- kaungā‘api he taimi kōtoa pē, te ke tāpuni ‘e koe ‘a e matapā ki he kakai kehe, pea te ke faka‘osi pē ki he fakafaingata‘a‘ia‘i ho hala. Ko e ngaahi to‘onga pehē te ne hanga ‘e ia ‘o faka‘auha ‘a e makatu‘unga ‘o e fakalakalaka, mo fakavaivai‘i ‘a e kaha‘u ‘o ha‘a tangata.

‘Oku totonu ke tau foaki pa‘anga ki he fakakaukau ‘e ‘aonga ki he tokotaha kōtoa, mo teke ki ha ‘ekonōmika fakamāmanilahi ‘oku faingōfua, kau kātoa ki ai, anga tonu mo palanisi, ke fokotu‘u ha tu‘unga ke muimui‘i ‘aki ha fakalakalaka ‘oku tatau ki he kakai kōtoa pē. ‘Oku totonu ke tau ngāue fakataha ki ha fakalakalaka ‘oku tatau mo e tu‘umālie ki he ngaahi fonua kōtoa pē, ta‘akifu‘u e masivá mo e fakaholomui, ‘a ia ‘oku ne kei faka‘auha e kakai he ngaahi fonua tokolahi, pea mo fokotu‘u ha mo‘ui fiefia ki he fānau kōtoa pē ‘i māmani. Te ne fakaivia ‘a e ngaahi fonua kōtoa pē, ke ‘aonga kiate kinautolu ‘a e fakalakalaka, pea mo e kakai kōtoa pē ke nau fiefia mo mo‘ui tu‘umālie, melino mo mo‘ui lelei.

‘Oku totonu ke tau feinga ke langa ha māmani ‘oku faingōfua pea ongo‘i ‘e he tokotaha kōtoa ‘oku kau ki ai, ha māmani ‘oku tau‘atāina mei he nofo li‘ekina. Hangē ko e lea ‘a e kau Siaina, “Ko e me‘a mo‘ui kōtoa pē ‘oku nau mo‘ui fakataha ‘o ‘ikai fakamele‘i ha taha kehe; ko e la‘aa, māhina mo e ngaahi fa‘ahi ta‘u, ‘oku nau takamilo fakatatau ki he‘enau ngaahi lao, ‘o ‘ikai fakafe‘atunga‘i ha taha.” Ko e tuku‘au mo‘ui mai ‘a e sivilaisé mo e fakalakalaka ‘a ha‘a tangata, he‘ikai lava ‘o kapau he‘ikai ke fakalahi ‘a e tu‘u tatau ‘a e ngaahi fonua, faingōfua, kau kōtoa ki ai, fetokoni‘aki mo feako‘aki ‘i he ngaahi sivilaise, mo loto lelei.

‘Oku totonu ke mo‘ui ‘a e sivilaise kōtoa pē, pea nau mo‘ui fakataha ‘i he fetaiaki mo e tokotaha kōtoa pē, mo fakafonu ivi kita mei he mālohinga ‘o e kakai kehe, ke faka‘ai‘ai mo teke ‘a e fakalakalaka ‘a ha‘a tangata – ko e ui eni ‘o e hisitōlia. ‘Oku totonu pē ke tau manatu‘i ko māmaní ‘oku fonu he ngaahi lanu kehekehe mo e ngaahi sivilaise kehekehe, pea ‘oku totonu ke tau sio ‘oku hanga ‘e he ngaahi sivilaise kehekehe kó eni, ‘o fakakoloa ‘a e ngaahi sivilaise kehé, pea ‘oku ne fakatupu ‘e ia ha māmani fakalata. ‘Oku totonu ke tau ngāue fakataha ke holoki e ngaahi ‘ā vahevahe faka‘ulungāanga, ta‘ofi ‘a e lau lanú ‘a ia ‘oku ne maumau‘i e vā ‘o e taha mo e taha, mo fakangata ‘a e fetāufehi‘a‘aki koe‘uhi ko e kehekehe ‘o e ‘ulungāanga, ‘a ia ‘oku ne ta‘ofi e feohi ‘a e tokotaha mo e taha. Tau ngāue fakataha ke fakapapau‘i ‘oku malava ke fetaiaki ‘a e ngaahi sivilaise, pea fiefia ‘a e tokotaha kōtoa ‘i he funga ‘o e fefakakoloa‘aki ‘i he ngaahi ‘ulungāanga kehekehe.

‘Oku totonu ke tau feinga ke langa ha māmani ‘oku lanu mata, ma‘a mo faka‘ofo‘ofa. Ko māmaní, ko e ‘api pē ia ‘e taha mo ‘o e fa‘ahinga ‘o e tangatá ‘oku tau fevahevahe‘aki. ‘I he kuongá ni, ‘oku feinga ‘a e ni‘ihi ke kumi ha ‘api fo‘ou ‘i he sipeisi, ka ko e misi ia ‘oku kei taumāma‘o. Pea ‘i he kaha‘u vave mai, ‘oku kei fiema‘u pē ke nofo ‘a e tangatá ‘i he fo‘i palanite ko eni. Ko e fo‘i mo‘oni eni ‘e ‘ikai lava ke liliu. ‘Oku totonu ke tau kau fakataha hono malu‘i hotau palanite, ‘o ‘ikai ma‘atautolu pē, ka ki he to‘utangata ‘o e kaha‘u. Koe‘uhi ‘oku tau tui ‘oku fetaiaki ‘a e tangatá mo natula, ‘oku totonu ke tau mahu‘inga‘ia ‘i he ‘ātakai, ‘o hangē pē ko ‘etau mahu‘inga‘ia he‘etau mo‘ui. ‘Oku totonu ke tau fakalangilangi‘i, faka‘apa‘apa, ngāohi mo malu‘i a natula. ‘Oku totonu ke tau malu‘i hotau palanite, tahá ni ‘e toe lava ke fakafetongi, ko hotau ‘api eni, faito‘o e ngaahi lavea ‘i he ‘ātakai, pea langa ha ‘api mo ha‘a tangata ‘oku fetaiaki mo tau fie nofo ai. ‘E fakangofua heni ki he fanga ki‘i komiuniti fakaenatula, ke nau toe mo‘ui hake mo fakatupu fo‘ou ‘iate kinautolu pē, mo fakangofua e tokotaha kōtoa pē ke nau mo‘ui ‘i ha ‘ātakai ‘o e vai ‘oku ma‘a, mo e ngaahi mo‘unga ‘oku lau ma‘ui‘ui.

‘I he ngaahi ‘aho ni, ‘oku liliu ‘a māmani, ‘o hangē pē ko ia ko ‘etau ngaahi sīpinga ki he fakalakalaká. ‘Oku pau ke ngā‘unu ‘a e ngaahi paati politikale mo e tā‘au ‘o e taimi, ma‘u ha mahino lelei ‘o e ngaahi ‘ālunga ‘o e fakalakalaka ‘a ha‘a tangata, fetaulaki mo e ngaahi ‘amanaki ‘a e kakai, pea fakafehokotaki ofi leva ‘a e fakalakalaka fakaēkita, mo e fakalakalaka ‘a e fonua, pule‘anga mo ha‘a tangata. ‘Oku fiema‘u ke tau tulitulifua ki ha taumu‘a ‘oku mā‘olunga mo sio ki he lele lōloa, ma‘u ‘a e lotolahi ke fua e ngaahi fatongia, mo fua e ngaahi mīsiona ‘o e taimi, manatu‘i ma‘u pē ‘a e ngaahi fiema‘u ‘a e fonuá mo māmani, pea mo e ngaahi fiema‘u fakalūkufua mo e ngaahi fiema‘u ‘i he lele lōloa.

‘Oku totonu ke tau ma‘u ha ‘ilo fe‘unga ki he tu‘unga hotau kakai, pea liliu ‘enau ngaahi fiema‘u ki he ngaahi fakakaukau ‘a e Paati, kaveinga, taumu‘a mo palani ha ngaahi founga ‘oku pau mo lava ‘o fakahoko. Ko e langa ‘o e komiuniti fakaemāmani lahi ‘oku nau vahevahe ‘a e kaha‘u tatau, ‘oku fiema‘u ke kau ki ai ‘a e kakai kōtoa pē. Ke tau laka ki mu‘a ‘i he ‘uhinga ko eni, ‘oku fiema‘u ke tau langa hake ‘aki e fai e loto ‘o e tokolahi ‘o e kakai ‘o e ngaahi pule‘anga kehekehe, tui mo e ‘ulungāanga kehekehe, mo e ngaahi feitu‘u kehekehe.

Ke tau a‘usia ha fu‘u misi lahi faufaua, ‘oku mahu‘inga ke tau ngāue‘aki ‘a e poto mo e mālohi ‘o kinautolu kōtoa pē ‘oku kau mai. ‘Oku fiema‘u ke tau feinga ke fakatahataha‘i ‘a e ngaahi fakakaukau mei he tapa kōtoa pē, ngaahi lēvolo kehekehe mo e ngaahi sio mei he tapa kehekehe, teke ‘a e ngaahi ngāue ‘oku lelei taha, fekumi ki ha ngaahi fakakaukau fo‘ou, faka‘ai‘ai e laumālie ngāue, pea hiki e vave ‘o e ngāue ki ha lēvelo ‘e taha. ‘Oku totonu leva ke fakalahi ‘e he ngaahi paati fakapolitikale mei he ngaahi fonua kehekehe ‘a e fefalala‘aki, talanoa, mo e fekau‘aki. Kapau te tau langa hake ha sīpinga ‘o e vā fakavaha‘apule‘anga, ‘oku totonu ke tau fakasio ha sīpinga fo‘ou ‘o e vā fakapaati, koe‘uhi ke lava ai ‘e he ngaahi paati fakapolitikalé ‘o fakalahi e ngaahi me‘a ‘oku nau tu‘unga tatau ai, pea ‘i he taimi tatau pē, ke tukuange e ngaahi faikehekehe; pea mo fefaka‘apa‘apa‘aki mo feako‘aki. ‘Oku totonu ke tau langa ha netiueka fakavaha‘apule‘anga ‘i he ngaahi lēvolo kehekehe mo e kalasi kehekehe ke ngāue‘aki ki he fakafetongi fakamatala mo e ngāue fakataha. ‘E lava kotoa ‘e he ngaahi me‘a kó eni, ‘o ngāue fakataha pea mo fo‘u ha ivi mālohi ki hono langa hake ha komiuniti fakaemāmani lahi ‘oku nau ma‘u ‘a e kaha‘u tatau.

‘E hoko ha ki‘i hālanga tangata ko ha tukutukulaumea, ‘o kapau ‘e ‘alu‘i; pea ‘e a‘usia pē ha kaveinga ‘o ka fai ha ngāue. Ko e langa ‘o ha komiuniti fakaemāmani lahi ‘oku nau ma‘u ha kaha‘u tatau, ko e founga fakahisitōlia ia. He‘ikai ke lava pe ia ‘o fakahoko ‘i ha pō ‘e taha, pea he‘ikai ko ha folau nonga. Ko e tu‘ukāiví mo e fakaongosiá ‘oku fu‘u fiema‘u ‘aupito. Ke tau langa ha komiuniti pehē, kuopau ke tau tōtōaki pea fai ke ongosia. Kuopau ke ‘oua te tau tukuange ‘etau misi, koe‘uhi ko ha ngaahi me‘a ‘oku fihi, pea ‘oua ‘e tuku ‘etau muimui‘i ‘etau ngaahi fakakaukau, koe‘uhi ko ha ‘ikai faingōfua ke tau a‘u ki ai.

Ko e Paati Kominiusi ‘a Siainá ‘oku fakatāpui ‘enau mo‘uí ma‘ae kakai ‘o Siaina, pea mo e fakalakalaka ‘a ha‘a tangata. Ko e paati fakapolitikale lahi taha ia ‘i māmani. Hangē pē ko ia na‘a ku lea ‘aki ki mu‘a, ko e Paati Kominiusi ‘a Siaina, kuopau ke ngāue hangē ko ia ‘oku tau ‘amanaki ki aí mei he Paati tokolahi pehee. Ko ‘emau ngāue ia, ‘a e kau Kominiusi Siainá ke fakalelei‘i ‘a e ngaahi mo‘ui ‘a e kakai Siaina, fakaakeake ‘a e Pule‘anga Siaina, poupou‘i ‘a e melinó mo e fakalakalaká ma‘a ha‘a tangata. Kuopau foki ke tau fakalele lelei hotau fonua pē ‘otautolu, he ko e kau ia ki he lelei fakalūkufua ‘a hono langa hake ‘a e komiuniti fakaemāmanilahi, ‘oku nau vahevahe ‘a e kaha‘u tatau. ‘Oku mau loto ke fokotu‘u ha ngaahi faingamālie ki he toenga ‘o māmani, ‘o fakafou atu he‘emau fakalakalaka. Te mau a‘usia ‘a e fakalakalaka fakasōsialé ‘i he‘emau ngaahi ngāue, pea mau vahevahe ‘emau ngaahi a‘usiá mo e ngaahi fonua kehe. ‘Oku ‘ikai ke mau loto ke mau ‘omai ha ngaahi sīpinga mei he ngaahi fonua kehe, pea ‘oku ‘ikai ke mau fiema‘u ke fakamāketi atu ki ha fonua kehe ‘emau sīpinga mei Siaina; pea ‘e fakasi‘isi‘i ‘emau kole ki he ngaahi fonua kehe, ke hiki tatau ‘emau ngaahi sipinga ngāue. Ko kimautolu kau Kominiusi Siaina, te mau nofo taha pē ‘o fai mo‘oni ki he ngaahi palōmesi kó eni:

‘Uluaki, ‘e hoko atu pē ‘emau ngāué ki he melino mo e nonga ‘a mamani.

‘I he ta‘u ‘e teau kuo hili, na‘e kamata ai ‘a e Paati Kominiusi ‘a Siainá lolotonga ‘oku hou tu‘u e fonua. Ko e taha ‘o e ngaahi mīsiona na‘e kamata‘aki, ko hono fakangata ‘a e faingata‘a‘ia fakamanavahē na‘e mo‘ua ai ‘a Siaina mei he ngaahi taú, pea mo e kakai Siainá mei he masiva ‘ango‘ango talu mei he senituli 19. ‘I he vaha‘a ‘o e 1921 mo e 1949, na‘e tānaki mai ai ‘e he Paati Kominiusi ‘a Siaina, ‘a e kakai Siainá ‘o tataki kinautolu ‘i he tau he ta‘u ‘e 28, mo fakahoko e ngaahi kalusefai lahi, koe‘uhí ke ‘ausia ‘a e melino mo e ma‘uma‘uluta ‘i Siaina.

‘I he‘emau fononga mai he ngaahi me‘a kó eni, ne mau ‘ilo lelei ai ‘a e mahu‘inga ‘o e melino; pea ko e ‘uhinga ia ‘oku mau loto ma‘u ai ke tauhi ‘a e melino. ‘Oku nofo ma‘u pe ‘a Siaina ki hono poupou‘i ‘o e melino, fakalakalaka, mo e ngāue fakataha, mo e fakahoko ‘a e ikuna e ongo fa‘ahi ‘e ua. Te mau muimui‘i ai pē ‘a e fakalakalaka ‘o e melino, poupou‘i e langa hake ‘o e ngaahi hoa ngāue fakamāmani lahi, pea mo mau ngāue longomo‘ui ‘i he ngaahi founga fakapolitikale hono fakalelei‘i e ngaahi ‘īsiu faingata‘a fakavaha‘apule‘anga.

‘Oku ‘oatu foki ‘e Siaina e kau sōtia, fakafuofua hono fakakātoá mo e toko 36,000 mo e pa‘anga ki he ngaahi feinga fakamelino ‘a e Pule‘anga Fakatahataha. ‘I he lolotongá ni, ko e kau fakamelino ‘e 2,500 mei Siaina ‘oku nau lolotonga fai fatongia atu ‘i he ngaahi feitu‘u kehekehe ‘e 8 ‘i he malumalu e ngaahi mīsiona ‘o e Pule‘anga Fakatahataha, ke malu‘i ‘a e melino mo e malu ‘a e ngaahi fonua, ‘o tatau ai pe ‘a hono faingata‘a mo e fakatu‘utāmaki ‘oku hoko.

‘E hoko atu ai pē ‘a e kau ‘a Siainá ki he fakalelei mo e fakalakalaka ‘a hono pule‘i ‘o māmani, mo tokoni ke ‘i ai ha liliu ‘oku totonu mo angatonu ki he mo‘ui faka‘ekonōmiká mo e fakapolitikale fakavaha‘apule‘anga. ‘E tatau ai pē pē ko e hā e me‘a ‘e a‘u ki ai ‘a e fakalakalaka ‘a Siaina, ka he‘ikai ke fie pule‘i ‘e Siaina ha fonua ‘e taha pe holi ke fakalahi ‘a ‘ene pule ki ha fonua ‘e taha. ‘Oku tau kole ki he ngaahi paati fakapolitikale ‘i he ngaahi fonua kōtoa pē, ke nau kau mai ‘o hoko ko e kau langa ‘o e melino ‘a māmani, kau mai ki he fakalakalaka fakaemāmani lahi, pea mo malu‘i ‘a e vā fakavaha‘apule‘anga.

Ua, te mau hoko atu pē ‘a e ngāue ki he fakalakalaka angamāheni. Na‘e tupu ‘a e Paati Kominiusi ‘a Siaina mei he kakai pea ‘oku fakatefito pe ‘enau tupú mo e fakalakalaká ‘i he kakai. ‘Oku nau tokanga ma‘u pē ki he kakai Siainá mo ha taha pē, pea nau nofo ma‘u ki he ngāue ki he‘enau mo‘ui.

‘I he ngaahi ta‘u kuo hili, ne tokoni ai ‘a Siaina ki he ngaahi fonua langalanga hake tokolahi ‘i he ngaahi founga kehekehe, ‘o kau ai ‘a e ngaahi tokoni tau’ataina (free aid) mo e ngaahi no ‘oku malava ke fakaloloa hono taimi totongi (concessiona loan) pea pehē ki he ngaahi tokoni fakatekinikale, kau ngāue mo e kakai ‘oku ‘i ai honau poto makehe. ‘Oku tokoni eni kiate kinautolu ke fakakakato e ngaahi polōseki lahi, ke fakafaingōfua ‘enau fakalakalaka faka‘ekonōmika mo e fakasōsiale, mo hiki hake ‘a e mo‘ui ‘a e kakai΄. ‘I he ngaahi ‘aho΄ ni, ‘oku toko lauiafe ‘a e kau Saiēnisi Siaina, kau ‘enisinia, kau pisinisi, kau tekinikale, toketā, kau neesi, kau faiako, kau ngāue ‘ofa ‘oku nau ngāue fetākinima mo umoumataha mo e kakai ‘i he ngaahi fonua langalanga hake, ke tokoni‘i kinautolu ke liliu ‘enau mo‘uí ki he lelei ange.

‘I he faka‘uto‘uta ‘a e Paati Kominiusi ‘a e Kakai ‘o Siaina ‘i he Fakataha FakaFalealea hono 19 ‘i he 2017, ‘e a‘usia ‘e Siaina ha tu‘umālie ‘i he tapa kōtoa pē ‘i he fonuá ‘i he ta‘u 2020. Te ne toe a‘usia foki ‘a e sōsiolisi fakaeonopooní ‘i he ta‘u 2035, pea ‘e liliu ki ha fonua sōsiolīsimi fakaeonopooni ‘oku mālohi, temokalati, ‘ulungāanga lelei, melino mo faka‘ofo‘ofa ‘i he lolotonga e senituli. ‘E ‘aonga eni ki he kau Siaina, mo e kakai e ngaahi fonua kehe. ‘Oku mau fokotu‘u atu ki he ngaahi paati fakapolitikale ‘o e ngaahi fonua kōtoa pē, ke nau ngāue fakataha mo kimautolu mo fokotu‘u ha ngaahi faingamālie ngāue fakataha ‘e ‘aonga ki he ngaahi fakalakalaka angamāhení mo e tu‘umālie.

Tolu, te tau hoko atu pē ki hono teke e fakafetongi ‘o e ngaahi fakamatalá mo e feako‘aki ‘i he uhouhonga e ngaahi sivilaise.

‘Oku ‘i ai e lea ‘a e kau Siainá ‘oku pehē, ko e maka to‘o mei he mo‘unga kehe, te ne fai fatongia ke fakangingila ‘a e makakoloa fakalotofonuá – ko e fale‘i mei he kakai kehe ‘oku nau tokoni ke feau ‘ete tō nounou. ‘Oku fakamamafa‘i ‘e he Paati Kominiusi ‘a Siainá ‘a e fiema‘u ke fakalelei‘i ‘a e sio fakaemāmani lahi. Kuo tau ako mo ‘ilo e ngaahi lelei ‘o e anga fakafonua ‘o e ngaahi fonua kehe, ‘o fakakau kinautolu ki he ‘ātakai ‘o Siaina. ‘Io, ko e Mākīsisí ko e mo‘oni‘i me‘a ia kuo tau ako mei he ngaahi fonua kehe. Kuo tau fakakau mai ‘a e Mākīsisi ki he tu‘unga ‘oku ‘i ai ‘a Siaina, tauhi hono ngaahi akonakí mo fakalahi ‘o toe manakoa ange. Ko hono ola, kuo hoko e Mākīsisimi ko e fakakaukau ‘oku ne fakahinohino ‘a e ngaahi feinga ‘a e Paati Kominiusi, ke tataki ‘aki e kakai Siainá ke nau fakalaka kimu‘a.

‘Oku hanga atu ‘a e Paati Kominiusi ‘a Siaina ki he ngaahi a‘usia ‘o e ngaahi anga fakafonua kehe, mo ha ‘atamai ‘oku fa‘ātaa mo ha loto ‘oku toe matala ange. ‘Oku mau fiema‘u ke kau ki ha ngaahi talanoa, fealēlēa‘aki mo e ngāue fakataha mo e kakai, mo e ngaahi paati fakapolitikale ‘o e ngaahi fonua kehe, pea ‘oku mau poupou ki he ngaahi fakafetongi ‘i he ‘ulungāanga fakafonua, mo e kakai ‘i he ngaahi fonua kehekehe.

‘I he ta‘u ‘e nima ka hoko mai, ‘e fakaafe‘i ‘e he Paati Kominiusi ‘a e Kakai, ha kau mēmipa ‘e toko 15,000 mei he ngaahi paati fakapolitikale ke ‘a‘ahi ki Siaina ke fai ha fealēlē‘aki mo e feohi. ‘Oku mau fokotu‘u atu e Talanoa ‘a e Paati Kominiusi ‘a Siaina mo e ngaahi Paati Fakapolitikale ‘a Māmani, ki he Fakataha Mā‘olunga ke hoko ko e sino ke ‘aonga ki he kakai pea ke ngaohi ko e makatu‘unga ki he talanoa fakapolitikale, mo ha kau fakafofonga tokolahi mo fakavaha‘apule‘anga.

‘I he ta‘u ‘e ua afe ki mu‘a, na‘e pehē ‘e he Filōsefa Siaina ko Konifiusi ‘oku totonu ke te kaume‘a mo e kakai ‘oku hangatonu, anga mo‘oni mo ‘ilo lahi. ‘Oku ‘osi maau ‘a e Paati Kominiusi ‘a Siainá ke langa e mo‘ui fakakaungāme‘a ‘i māmani. ‘I he ngaahi ta‘u kuo hili, kuo mau tauhi ha ngaahi fetu‘utaki mo e ngaahi paati fakapolitikale ‘e 400 mo e ngaahi kautaha ‘i he ngaahi fonua ‘e 160 mo e ngaahi feitu‘u lahi, pea kuo tokolahi homau ngaahi kaungāme‘a.

‘I he‘emau ngā‘unu ki mu‘a, ‘e fakalahi ‘e he Paati Kominiusi ‘a Siaina ha ngaahi fakafetongi mo e ngaahi paati fakapolitikale ‘o e ngaahi fonua kehe, ke vahevahe ‘a e ngaahi fakakaukau ke fakalahi e ngaahi me‘a ‘oku malava ‘e he ngaahi paatí mo e pule ‘a e pule‘anga, mo fakahoko ha toe ngaahi fakafetongi mo e talanoa ‘i he uhouhonga ‘o e sivialise, ke fakalelei‘i ‘a e fefalala‘aki. Ko kitautolu e kakai ‘o e ngaahi fonua kōtoa pē, ke tau fepukenima‘aki ke langa ha komiuniti fakaemāmani lahi ‘oku tatau honau kaha‘ú mo ha māmani ‘oku toe lelei ange.

--
#5780 Sponsored advertising content, 202012-0316