Ko e fokotu'u ke to'o 'a e mafai taki 'o e 'Eiki Palemia mo 'ene Kapineti [1]
Monday, July 2, 2012 - 22:15. Updated on Monday, September 9, 2013 - 18:40.
[Full text of the Motion of No Confidence in the Prime Minister, presented to the Speaker on June 18]
Monite, 18 'o Sune, 2012
Lord Lasike,
'Eiki Sea 'o e Fale Alea 'o Tonga,
'Ofisi 'o e Fale Alea 'o Tonga,
Nuku'alofa.
'Eiki Sea,
Fili fakahahaloto 'o e ta'e falala ki he 'Eiki Palemia (Vote of No Confidence in the Prime Minister)
1. 'Oku mau faka'apa'apa ki he Feitu'una mo 'oatu 'a e tohi fokotu'u ni.
2. 'Oku foaki 'e he Kupu 50B 'o e Konisitutone 'a e totonu ki he Hou'eiki Memipa ke fokotu'u atu ki he Fale Alea ke fai ha paloti fakahaloto ke fakamaloloo'i 'a e Palemia 'i ha taimi 'e 'ikai toe vave ange he mahina 'e 18 mei he 'aho na'e fakahoko ai 'a e fili lahi; e 'i loto 'i he mahina 'e 6 pea hoko 'a e fili lahi hono hoko'; pe 'i loto 'i he mahina 'e 12 mei he 'aho 'a ia na'e paloti fakamuimui taha ai ha fokotu'u fili fakahaloto 'i Fale Alea ke fakahifo 'a e 'Eiki Palemia.
3. Na'e kakato he 'aho 25 'o Mee, 2012 'a e mahina fakalao 'e 18 mei he 'aho 25 'o Novema, 2010, 'a ia na'e fakahoko ai 'a e fili lahi fakamuimui.
4. Ko e laumalie 'o e Kupu 50B 'o e Konisitutone ko hono fakamafai'i o e Hou'eiki Memipa 'o e Fale Alea ke nau fakapapau'i 'oku tataki lelei 'e he Palemia mo 'ene Kapineti 'a e Pule'anga. Ko e taki ko ia 'e fai 'o fakatatau ki he Konisitutone mo e pule 'a e lao, pea ke hasino mei ai 'a e Pule Lelei, Taliui ki he Fale Aea, pea ke 'Ata-ki-Tu'a mo mahino 'a 'ene founga ngaue.
5. Ko e Kupu 50B 'o e Konisitutone ko ha naunau malu'i kuo fatu fakaloto'i sisitemi – ko ha me'afua ta'e-mamotu fakapule'i-ngaue 'o e Pule'anga (inbuilt corrective mechanism), ke ne fakapalanisi mo fakapapau'i 'oku hoko ma'u pe 'a e Pule Lelei. Ka 'asi ha maumau pe faihala, pea ko e fakapotopoto taha, ke fakatonutonu ta'e toe tatali, 'o 'Ikai ha tautoloi ke hokohoko atu 'a e maumau ki ha tu'unga ta'e mapule'I, he 'e uesia ai 'a e lelei fakalukufua 'a e Kakai 'o Tonga.
6. 'Oku kei laumalie 'a e Kupu 17 'o e Konisitutone 'a ia 'oku ne tala fakapatonu mai 'a e ngafa mo e fatongia fakataki 'o e Tama Tu'i: "'E fai 'e he Tu'i 'ene pule koe'uhi ko hono kakai kotoa pe, 'e 'ikai fai ko e me'a ke koloa'ia pe lelei 'ia ha toko taha, pe ha fimili 'e taha, pe ha fa'ahinga 'e taha, ta'e filifilimanako, ka koe'uhi ke lelei mo monu'ia 'a e kakai kotoa pe 'o hono Pule'anga." 'Oku fakapapau'i mai heni 'a e pau ke ta'e filifilimanako 'a e fatongia pule, pea ko e kaveinga fisifisimu'a 'o e pule 'a e Tu'i ko e pau "ke lelei mo monu'ia 'a e kakai kotoa pe 'o e Pule'anga ni."
7. Ka kuo 'osi momoi mai foki 'e he Tu'I hono mafai pule ko'eni ki he Va'a Fakahoko Fatongia 'o e Pule'anga, ki he Palemia mo e Kapineti (Executive). 'I he'ene pehe, 'oku mo'ua 'a e 'Eiki Palemia mo 'ene Kapineti ke fakapapau'i 'oku nau fakahoko lelei 'a e taumu'a 'o e Kupu 17 'o e Konisitutone, ke malu'i e falala na'e momoi mai 'e he 'Ene 'Afio. 'Oku toe fakapapau'i mai 'a e kupu-fekau'aki 'o e ngafa fakatoukatea ko ia 'i he Kupu 50A 'o e Konisitutone, palakalfi (3): "Kuo pau ki he Palemia ke toutou lipooti ki he Tu'i, pea I hono fiema'u 'i he ngaahi me'a kuo hoko felave'i mo e pule'anga, pea mo e tukunga 'oku 'i ai 'a e fonua." Ko ia, neongo kuo momoi faka-Konisitutone mai 'e he'ene 'Afio ki he Kapineti, 'a hono mafia fakapule'i ngaue ki hono fakalele 'o e Pule'anga, ka 'Oku kei 'i he 'Ene 'Afio ai pe 'a e ngafa fatongia ke fakapapau'i 'oku pule'i lelei 'a e Pule'anga mo e Fonua, 'o fakatatau ki he Kupu 41 'o e Konisitutone: "Ko e Tu'i ko e Pule 'o e kau Nopele mo e Kakai kotoa pe . . . 'Oku 'iate ia 'a hono pule'i 'o e Fonua, ka 'oku 'i he 'Ene kau Minisitaa 'a hono fai 'a e ngaue 'o e fonua (responsible) . . ."
8. Na'e nguae malohi 'a e Hou'eiki Memipa 'o e Fale Alea he 'aho 20 mo e 21 'o Tisema 2010 ke fili ha Palemia ke ne tataki hotau Pule'anga ni; pea na'e malohi 'a e paloti ke taki 'e Lord Tu'ivakano hotau Pule'anga. Na'a ne fili leva 'ene Hou'eiki Minisitaa, pea pau ai ke 'ave kotoa 'etau falala kiate ia mo 'ene Kapineti.
9. Ka 'i he mahina 'e 18 kuo hili ange, na'e hoko ha ngaahi me'a 'i he loto'i Pule'anga 'oku matuaki ta'e falala'anga ai e tataki 'a e 'Eiki Palemia, tapu mo ia, 'o anga peheni:
i. Na'e mahino kuo hoko e ngaahi ngaue ta'e fakakonisitutone, mo e ngaahi tu'utu'uni ta'e fakalao 'a e Pule'anga, 'a ia kuo toutou maumau'i ai e fekau mo e fiema'u ke ngaue ta'e filifilimanako e Pule 'a e Lao (Rule of Law).
ii. 'Oku 'Ikai ala faka'ikai'i 'a e tala'a 'a e kakai 'o e fonua he nunu'a kovi 'o e ta'e maau 'o e toutou fetongitongi mo e fehikitaki fakapotungaue 'a e Hou'eiki Minisita 'o e Kapineti. 'Ikai ngata ai, ko e ngaahi fehikitaki ni 'oku 'ikai fu'u mahino hono founga mo hono taumu'a lelei, pea 'oku fakatupu tala'a ia ki he kakai 'o e fonua mo e Hou'eiki Minisita fakatou'osi. Pea ko'ene totu'a e 'a e ta'e femahino'aki kuo toutou 'asi ai 'a e ngaahi ta'e fiemalie ni he letioo, televisone, 'initaneti mo e nusipepa. 'I he mahina 'e 18 kuo hiliange kuo 'osi fetongitongi Minisita taki ua mo taki tolu e ngaahi Potungaue 'e ni'ihi, pea 'oku toe ene atu 'eni ki he 'aho 'uluaki 'o Siulai, ke fakakakato e takai taki ua mo e taki tolu 'a e Potungaue 'e ni'ihi. Ka toe fakakau atu mo e fehikitaki fakaangaanga, kuo tokolahi e Hou'eiki Minisita kuo taki ua mo taki tolu, pea ko e Minisita 'e taha kuo tu'o fa – na'e Minisita Polisi, Takimamata, pea lau ke Minisita Ngoue, pea toe liliu ke Minisita mo'ui, pea 'oku te'eki mahino pe 'e Minisita ha 'i Siulai. Ko e ngaahi potungaue kuo 'osi fetongitongi tu'o tolu 'enau Minisitaa, 'oku faka'avalisi ke ngaue taki mahina 6 pe Minisitaa pea si'i lukuluku e kau ngaue ke kai me'akai fakamavae, pea toe kai me'akai fakafe'iloaki mo 'enau Minisita fo'ou. Ka taki mahina 6 leva 'a e faifatongia fakaminisitaa, pea 'oku 'ikai mahino pe ko e o 'o fakahoko ngaue, ako nguae pe 'eve'eva ki he potungaue (having a good time). 'Oku hanga 'e he ngaahi fehikitaki ta'e maau, ta'e pau mo faikehekeke fakalotofale ko'eni, 'o fakaha mahino mai ki he kakai 'o e fonuaa 'oku 'ikai ke 'i ai ha siate folau pau mo mahino 'oku fakataumu'a ki ai 'a hono pule'I 'e he 'Eiki Palemia 'a e fakahoko fatongia 'a 'ene kau Minisitaa. Ko e faka'ilonga pau 'eni 'o ha Pule'anga ta'e pau!
iii. Ko e tupu faka'ekonomika mo e langa fakalakalaka 'a e fonua, 'e makatu'unga ia 'I he falala 'a e kakai ki he 'uli ngaholo, fakapotopoto, taukei taki, mo e tu'utai e fakahoko fatongia ki hono foefoelua hotau vaka fakafonua ko e Pule'anga 'o Tonga. 'Oku mahino 'a e ikai malava 'e he 'Eiki Palemia ke fakama'opo'opo e Pule'anga mo 'ene Kapineti. 'Ikai ngata ai, ka 'oku 'Ikai malala 'e he 'Eiki Palemia ke ne tataki mo pule'i lelei 'a e ngaahi feinga langa fakalakalaka 'a e Pule'anga, ma'ae lelei fakalukufua e kakai 'o e fonua.
10. Ko e tokolahi taha 'o e fonua ni 'oku nau fakapapau'i mai na'e 'ikai ke nau fili 'a e Kapineti lolotonga, he na'e 'ikai ke nau fili 'a e 'Eiki Palemia ki loto Fale Alea. Ko ia, ko e Hou'eiki Memipa 'o e Kapineti na'e fili 'e he 'Eiki Palemia, 'Oku 'ikai 'aupito ala lau faka-Temokalati ia ko e fili 'e he kakai, tautefito ki he toe fili Minisita mei tu'a mei ha ni'ihi na'e 'ikai fili 'e he kakai ki Fale Alea, neongo hono tohi he Konisitutone. 'Oku fiema'u leva 'e he kakai, ke nau kau mo'oni atu ki hono fakalele 'o e Kapineti, 'aki hano fili 'o ha Palemia mei ha Fakafofonga na'e fili 'e he Kakai, ke ne kaunga fakalelei'i mo ha Kapineti te ne fili, 'oku vaofi mo taliui ki he kakai, 'a e ngaahi tu'utu'uni mo e polisi fakapule'anga, ke hoa mo e fiema'u 'a e kakai.
11. Na'e 'osi loto ma'ulalo homau tokolahi 'o fokotu'u atu tu'o ua ki he Taki 'o e Pule'anga lolotonga, ke mau kaunga fatu ha Pule'anga pe Kapineti ke ne fakatahataha'i lelei e ngaahi Vahe Fonua (Government/Cabinet of National Unity), 'i he malumalu 'o e taki 'o e Pule'anga lolotonga. Na'e tui 'a e Paati 'e tokoni 'a e fa'ahinga fa'unga Pule'anga ni ke ma'u ai 'a e Pule lelei mo e Vahevahe taau; ka na'e 'ikai fai mai ha tokanga makehe 'a e Pule'anga lolotonga ki he fokotu'u ni. Ko ia, kapau he 'ikai ke mau toe tokanga ange ke fakama'opo'o mo fakatahataha'i 'a e fonua, 'e tukuaki'i kimautolu ' e he to'utangata 'o e kaha'u, ki he ta'e tokanga.
12. Ko e ngafa fakahoko fatongia 'o e 'Eiki Palemia, mo e Hou'eiki Minisita 'o e Kapineti, ke fakapapau'i 'oku nau fakahoko Faka-Konisitutone ma'u pe 'a e ngafa fakataki na'e momoi mai mei he Tu'i; ko ha toki fatongia matu'aki mafatukituki 'o hange ko e tala fatongia 'a e Kupu 30 'o e Konisitutone: "Ko e anga 'o e fai 'a e Pule 'o e Fonua ni ko e Pule'anga Tu'i Faka-Konisitutone . . ." Ko e pule 'a e tu'i mo hono fakalele 'o e Pule'anga ni, kuo pau ke fai 'o fakatatau ki he Konisitutone 'o e Fonua. 'I he'ene pehe, ka ta'e tokanga 'a e 'Eiki Palemia mo e Kapineti, kae hoko ha tu'utu'uni ta'e Faka-Konisitutone mo ta'e fakalao, ko e fatongia leva ia 'o e Fale Alea ke fakatonutonu mo ta'ofi he 'oku taliui 'a e Kapineti ki he Fale Alea 'o hange ko e Kupu 51, Palakalafi (1): "Kuo pau ke 'i he Kapineti 'a e mafai pule 'o e fonua, 'a ia kuo pau ke nau ma'u 'a e ngafa 'o e fengaue'aki fakataha mo e taliui ki he Fale Alea, 'a e ngaahi fatongia pule 'o e Pule'anga." 'Eiki Sea, mo e Hou'eiki Memipa 'o e Fale Alea 'o Tonga, 'Oku 'ikai ke mau lava 'o sio fakamatamatavalea loi mei homau fatongia faka'tu'utu'uni faka-Konisitutone ni.
13. Makatu'unga 'i he ngaahi ngaue ta'e fakapotopoto mo e ngaahi 'uhinga kuo fai ki ai 'a e lave, 'oku mau ongo'i mo'ua ki he 'Ene 'Afio, Konisitutone 'o e Fonua, Fale Alea 'o Tonga, 'emau takitaha Fuakava, pehe ki he falala ' a e kakai na'a nau fili kimautolu – 'oku mau fokotu'u atu ai ha fili fakahaloto, 'o fakatatau ki he Kupu 50B 'o e Konisitutone, ke fakamaloloo'i 'a e 'Eiki Palemia, Lord Tu'ivakano, kae toe fili ha Palemia fo'ou.
14. 'Oku mau fakapapau'i atu 'i he tohi ni, 'oku 'ikai makatu'unga 'a e fokotu'u ni 'i he fiemau mafai, loto sauni, sio langilangi, vahe lahi, pe fai fakalotokovi. Ko ia, oku 'oatu 'a e fokotu'u ni mo e ongo'i faka'apa'apa lahi ki he 'Eiki Palemia, Lord Tu'ivakano. 'Oku makafokafo homau loto 'i he 'ofa, 'apasia mo e loto tauhivaha'a mo'oni ki he 'Eiki Palemia mo e Hou'eiki Minisita 'o 'ene Kapineti; ka 'oku kouna kimautolu 'e he laumalie lelei 'o 'emau takitakaha fuakava; ngafa fatongia ke tauhi malu 'a e Konisitutone; mo 'emau taliui ki he fonua mo e kakai na'anau tuku mai enau falala kiate kimautolu, ke mau fakahoko ta'e filifilimanako homau fatongia ni, koe'uhi ko 'Ene 'Afio ko hotau Tu'i, mo e lelei fakalukufua 'a e Kakai 'o Tonga.
'Oku mau faka'apa'apa atu, ko e kau Fakafofonga 'o e Kakai, mo fakamo'oni ki he'emau fokotu'u ni:
1. Samuela 'Akilisi Pohiva
2. Semisi K. L. Sika
3. Sitiveni Halapua
4. 'Aisake V. Eke
5. Siosifa T. Tu'utafaiva
6. Sione S. Saulala
7. Sione H. Taione
8. Falisi Tupou
9. Semisi P. 'I. Tapueluelu
10. Mo'ale Finau.