Siaosi Tupou V: Malo 'a hono fakahoko 'a hoku loto [1]
Sunday, October 3, 2010 - 16:35. Updated on Monday, September 9, 2013 - 18:40.
'OKU kau 'a e ta'u ni 'i he ngaahi ta'u ngaue lahi taha 'o e Pule'anga pea mo e Fale Alea ki hono fakakakato 'o e ngaahi fakalelei ki he 'etau Konisitutone mo e Ngaahi Lao fekau'aki mo e ngaahi mafai mo e ngaahi fatongia 'o e Fakataha Tokoni mo e Kapineti, mo e Fale Alea pea mo e Fakamaau'anga.
Ka ko e fatongia mafatukutuki taha mo faka-hisitolia makehe 'o e Pule'anga mo e Fale Alea 'i he ta'u ni, ko hono fakahoko mo fakakakato 'a hono foaki atu 'a e toenga 'O Hoku mafai pule, ko e Tu'i 'o e 'Otu Tonga, ki he Kakai 'o e fonua.
'Oku 'oatu heni 'a 'eku fakamalo kia koe Sea, mo e Palemia mo e kau Minisitaa, pea mo e kau Fakafofonga 'o e kau Nopele, kae'uma'a 'a e kau Fakafofonga 'o e Kakai, 'i ho'omou loto lelei ke fakahoko 'A Hoku loto.
'Ofa ke tohitongi 'i he loto 'o e Tonga kotoa pe 'a e me'a koia kuo mou lotolelei ke fakahoko pea ke hiki tuee mo paa mavava 'a e to'utangata kotoa pe 'i hono manatua 'a e ngaue ni.
Pea kuopau ke tau tuku ma'u pe 'a e kololia ki he 'Otua pea mo e lotohounga'ia ki he Kau To'a 'o e kuohili, 'aia 'oku tau lava ai 'o taka 'i fonua malu 'i he 'aho ni.
'Oku tau manatu melie he ngaahi 'aho ni kia Kingi Siaosi Tupou 'Uluaki, he koia na'a ne fokotu'u 'a e 'uluaki Pule'anga Fakatu'i Faka-kalisitiane, Fakafonua mo Faka-temokalati, pea mo hono Ngaahi Huelo Makehe 'o hange koia Ko 'Ene foaki pe 'a hono ngaahi mafai faka-fonua ki he Pule'anga, pea mo e kelekele ke tukufakaholo ai 'a e kakai pea mo ho nau ngaahi 'ea 'o ta'engata. 'I he 'aho ni 'oku tau hanganaki atu ke tau fakakakato 'i hotau kuonga 'a e ngaahi ngaue mo e ngaahi visone 'a e 'Uluaki Fa pea mo e Kuohili, pea 'oku tau polepole mo fakafeta'i mo'oni, kuo 'osi fakatoka mai pe 'a e ngaahi vaa'ihala ni mei he Kuohili, pea 'oku 'ikai ko ha laakanga fakafokifa pe fakatu'upake ke tau faingata'a'ia pe mata-me'a-fo'oua ai.
Koia ai 'i he 'aho ni, 'oku ou 'oatu 'a 'eku fakamalo ki he Sea mo e Fale Alea 'o Tonga 'i hono fakahoko 'o e ngaahi fatongia mamafa 'o e 'aho ni.
'Ikai koia pe, ka 'oku 'oatu foki 'a 'eku fakamalo ki he Palemia pea mo e Pule'anga 'i hono fuesia pea mo hono fakahoko kakato 'a e ngaahi ngaue mamafatukituki na'e fiema'u ke lava pea mo fakakakato koe'uhi kae malava 'a e ngaahi polokalama ngaue lalahi mo faingata'a 'a e 'Otu Tonga 'i he ta'u faka-hisitolia ni.
Pea 'oku ou talamonu atu pea mo e fakatu'amelie ki he hoko atu 'a homou ngaahi fatongia ke kei hokohoko atu aipe 'a hono paotoloaki 'o e kaukaua, melino pea mo e tu'umalie 'a e 'Otu Tonga.
'Oku 'oatu mo e talamonu ki he fili Fale Alea 'oku 'amanaki ke fakahoko, pea 'Oku Ou kole atu ki he kakai 'o e fonua ke mou oo 'o fili homou kau Fakafofonga he 'aho fili Fale Alea.
'Oku 'oatu foki mo e fakamalo loto hounga mo'oni ki he Pule'anga 'Aositelelia, Pule'anga Nu'usila, Pule'anga 'o e Lepapilika 'o e Kakai 'o Siaina, pea mo e Pule'anga Siapani, pea mo e ngaahi Pule'anga kotoa pe 'oku nau tokoni mai ki hotau fonua 'i he ngaahi tapa kehekehe.
'Oku pehe mo e fakamalo ki he Pangike 'a Mamani, Pangike Fakalakalaka 'a 'Esia, Pule'anga Fakatahataha 'o 'Iulope, pea mo e Ngaahi Kautaha Fakavaha'apule'anga kotoa pe 'oku tau fengaue'aki 'i he ngaahi tokoni kotoa pe.
'Oku ou 'ofa atu ki he Tonga kotoa pe.
'Ofa ke kei fai tapuekina kitautolu 'e he 'Otua. George R, 30/0/10.