Fiema'u ke 'asi kimu'a 'a e kau tanaki pa'anga [1]
Friday, October 7, 2011 - 11:13. Updated on Monday, September 9, 2013 - 18:40.
'Etita,
'OKU ou kau fakataha mo e toenga 'o e fonua he fiefia mo e hakahaka he ngaue ma'ongo'onga kuo fakahoko 'ehe 'etau fanau 'Ikale Tahi 'o nau a'usia 'a e ola fisifisimu'a kuo tau lau 'ilo kotoa kiai. Pea 'oku masiva lea ke fakamalo'ia'i 'a e ngaue totoivi ne fakahoko 'e he faiako mo hono kau tokoni, pule folau mo e poate kae pehee foki ki he kapiteni mo e toenga 'o e fanau va'inga. Ko e lea pe 'o e 'aho ko e Malie! Tangane Tamaiki e Mateaki'i Fonua!
Neongo kuo matuku e fanau va'inga 'o takitaha foki ki he'enau kalapu mo e feitu'u 'oku nau nofo ai, ka 'oku te'eki ke fonohifo 'a e fiefia ia mo e fakavilovilo 'a e kainga Tonga 'i 'Aokalani ni he ngaahi hala. Pea feongo'aki he 'ea 'a e uki 'o e fu'u laka ke fakahoko he 'aho Falaite 7 'o 'Okatopa ni. Ko e fa'ahinga mafana ia 'oku 'ikai toe ma'u ia 'eha fonua ka ko Tonga pe. 'Oku ngali katoanga 'a e World Cup 'o e 2011 ko e fa'ahinga mafana na'e ha atu mei he kainga Tonga. Malo e poupou mo e 'ofa ki hotau fonua tupu'anga.
Kaikehe, kuo lava e fatongia 'o e fanau ka 'oku 'I ai 'a e tokanga atu pe koeha koaa ha me'a 'a e fonua (Pule'anga, Poate 'Akapulu, Ngaahi Komiti Poupou) kuo fakahoko ke fakahounga 'aki si'enau ngaue lelei na'e fakahoko. 'Oku ou lave'i ne 'I ai e ngaahi tokoni fakaseniti ne 'osi fakaa'u ki he fanau mei he ngaahi kupu kehekehe 'i Nu'usila ni. Pea 'oku ou 'amanaki ne 'osi 'oange 'e he Poate ha'anau ki'i me'a he lolotonga 'enau 'i heni. Ka 'oku ou tui 'oku kei 'I ai 'a e ngaahi sino na'a nau tanaki seniti ke foaki ma'ae fanau ka 'oku te'eki ke longona mai hono founga. Ne 'I ai 'a e fu'u ma'ume'atokoni efiafi (VIP Dinner) heni ne tanaki ai 'a e laumano, ne tatanaki 'e he kau 'Ikale Tahi Tutuku 'o Nu'usila ni ha seniti mei he ngaahi siasi mo e komiuniti, pea pehee foki ki he fu'u pa'anga ne tanaki 'e he kakai 'i Tongatapu 'o fakafou ki he Poate. 'Oku totonu ke mahino ko e vahe angamaheni 'a e fanau va'inga (toko 30) ki he taimi na'a nau fakataha ai ki Tonga 'o a'u mai ki he 'osi ko eni honau fatongia ne 'osi maau pe hono fokotu'utu'u 'ona mei mu'a 'e he Poate mo e 'ofisi fakahoko ngaue. 'Oku 'ikai ko ha me'a ia ne tuku fakafalala ki ha foaki 'ofa mei he kakai, ka ko e ngaahi foaki pehe ni 'e tanaki atu pe ia ko e ponasi ki he fanau va'inga.
Koia 'oku tau faka'amu ke 'asi mai kimu'a 'a kinautolu na'a nau tanaki 'a e ngaahi pa'anga ko eni mei he kakai 'o e fonua 'o fakaha ke 'ilo 'ehe kakai 'a e 'alunga 'o honau ivi. 'E matu'aki fiefia 'a e si'i kakai masiva na'e kau he foaki 'ofa 'okapau 'e a'u 'enau 'ofa ki he fanau va'inga pea ke 'aonga ki honau ngaahi famili. Tatau mo e ha 'a e fiefia 'a e kau kavatonga 'i 'Aokalani ni he mahino ne lava atu 'a e kau tangata mei he komiti 'o faka'u 'enau lukuluku ki he kato 'o e fanau va'inga 'i Okaihau. Neongo 'ene ngali si'isi'i, ka ko e loto na'e fai 'aki 'a e foaki 'oku hulu atu fau.
'Oku 'ikai ha me'a ia 'e 'ao'aofia ka 'oku mahu'inga pe ke 'ilo 'e he kakai, he taumaiaa ko ha'atau faka'osi fakatangi eni ki he kakai 'o e fonua. 'I he taimi tatau, 'oku mahu'inga pe ke si'i foki atu 'a e fanau va'inga mo ha ki'i seniti ke lava atu ai ha fo'i ma honau ngaahi famili mo hoko atu e teuteu ki he 2015.
'Ofa atu fau mo e manatu ma'u
Tofavaha
tofavaha03 [at] yahoo [dot] com ( tofavaha03 [at] yahoo [dot] com)