Lahi 'a e 'ilo kae 'ikai ma'u 'a e taukei ngaue [1]
Sunday, March 28, 2010 - 17:01. Updated on Sunday, May 25, 2014 - 21:31.
'Etita,
Ko e ki'i fakalavelave atu pe ki he lave 'a A.Mokofisi' 'o felave'i mo e fehu'I na'e fai 'e S. Sika he tokolahi 'o e kau muli 'oku nau ma'u 'a e tu'unga ma'olunga 'i Tonga'. Ko e 'uhinga 'oku ma'u ai 'e he kau muli 'a e faingamalie he 'oku nau maheni ngaue ange 'i he ngaahi potungaue oku nau taki ai' he tangata Tonga.
Ko e tu'unga fakaako 'a e tangata mo fafine Tonga' kuo 'i he tumutumu' ka ko e maheni ngaue' 'oku fu'u kei ma'ulalo 'aupito. 'Oku 'i ai pe foki 'a e maheni ngaue 'a e ni'ihi ka 'oku uesia lahi 'enau ngaue 'i he to'onga faka-Tonga ko e fetoka'i'aki tokua pea hange ai 'oku toonounou 'a e faifatongia' he 'oku malohi ange 'a e fema'aki, mo e famili, mo e ngaahi kaungame'a 'i he mahu'inga 'o e ngaue 'oku fai fatongia ai 'e tokotaha ko 'eni. 'Oku totonu foki ke mahino ki he Tonga' kuo pau ke ngaue ia he ta'u lahi ke ma'u 'a e tu'unga maheni ngaue pea 'e toki 'aonga leva 'a e mata'itohi BA, MA, PhD, mo e ha fua!
'I he mamata ki he ngaue 'a e Komisoni 'i hono fakatotolo 'o e Ashika, 'oku mahino ange 'a 'enau taukei faka-ngaue 'i he kau tangata mo fefine Tonga 'oku nau ma'u 'a e poto faka-ako ka 'I he tu'unga faka-ngaue 'oku kei mamaha 'aupito e tangata
Tonga'.
Ko e palopalema lahi 'oku 'i he ngaahi tu'unga ma'olunga 'i he pule'anga Tonga 'oku nau 'ohake 'a e kau mata'itohi he ngaahi mala'e kehe ke ngaue he potungaue 'oku 'ikai kainga ia mo 'enau poto faka-ako'. 'Oku toe lahi foki 'a e maumau 'i he taimi lahi 'oku taki ai 'a e Tonga' he 'oku ne fakakau 'e ia 'a
hono famili mo e kaungame'a 'i hono fakahu ki he ngaahi potungaue' kae tuku e kakai 'oku nau maheni ngaue ange mo poto he fa'ahinga ngaue koia.
'Ofa atu pe malo e ngaue!
Joshua Nehasi