Taumu'avalea 'a e liliu [1]
Wednesday, October 22, 2008 - 13:00. Updated on Monday, April 28, 2014 - 16:37.
'Etita,
'I hono lau ho'o ngaahi ongoongo mei he Falealea pea pehe ki ho'o fakamatala (editorial) kuo 'osi mo'oni 'eku tumu he tamu'avalea pehe hotau vaka. Ko e Falealea ena 'oku tau fakaongoongo ki ai ke 'uli'i hotau vaka ki he liliu, 'oku 'ikai ha'anau kapasa ia 'anautolu. Mahalo na'a 'oku nau kei ngaue'aki pe faafaa ki tahi, kae ngalo ange kuo mafana e 'ea pea mafana tatau e konga tahi kotoa 'o faingata'a ke tala e siate folau.
Kaekehe 'oku mahino hono fu'u fiema'u ia 'ona e Komisoni koe'uhi ke tau'ataina ia mei he ngaue 'a e Falealea he 'e fepaki ai e ngaahi fiema'u. Ka 'oku kei fiema'u e taukei mei muli ki he ngaue ni, hange ko Sir Paul Reeves pe ko ha kakai pe 'oku nau taukei he konisitutone, ke 'oatu 'ene taukei ke lalanga'aki e fala ko ena 'oku kei fai hono fatu. Kapau 'e lava pea tuku atu ki he Fale ke fai ha'anau feme'a'aki ai, ka 'oku ou manavasi'i, si'I nifi e lipooti 'a e komiti Tu'ipelehake kae nafa ena. Hili ia pea fakafoki ki he kakai ke fai 'enau lau 'i he fakahaloto (referendum) pea hoko atu mo hano ako'i 'o e kakai ki he fa'ahinga pule'anga pe founga 'oku fai ki ai e liliu.
Kou tui au ia na'a mo e 2010 'e fu'u vave ia ki he ngaahi ngaue kotoa ko ena. Kapau 'e 'osi he 2010 pea toki fili he 2011 na'a meimei ofiofi atu ki ai.
'Ofa ke mahino a ki he kakai ne nau 'oho kuikui 'o poupou'i ke fai e liliu he 2008 e mafatukituki mo e lahi 'o e ngaue ko eni. Ko e faingamalie eni ke fai ai e ngaue, pea 'oku tonu ke fai ke lelei koe'uhi ke tolonga na'a 'ai 'o kovi, pea tau tekina ai 'o hange ha paea 'i he 'au 'o taimi ko e 'ikai ha siate folau ke tau lelei ai.
Malo,
Samiu Sika
samiusika [at] ymail [dot] com