Ko e tu'i 'ofa a Siaosi Tupou V [1]
Friday, August 22, 2008 - 04:01. Updated on Thursday, September 11, 2014 - 16:18.
'Etita,
'I he mamata ki he 'Ene 'Afio Siaosi Tupou Nima 'i he'ene Ha'ele ki he 'api 'o e famili 'o Tae Kami 'oku ne fakafehalaaki'i e tukuaki'i kotoa pe ne fai 'e he fu'u kakai Tonga tokolahi 'i hono tukuaki'i 'oku 'ikai 'ofa hono kakai.
Ko e fisifisimu'a e me'a na'e hoko' he kuo faka'ali'ali 'e Siaosi Tupou V ki mamani katoa 'i he uike ne hilifaki ai hono Kalauni 'oku ne malava pe 'a e ta'e amanekina'. 'Oku 'i ai 'e fu'u laui mano kakai Tonga ne nau tukuaki'i e Tu'i mo hono tala 'o 'ene siokita na'e te'eki ke nau 'ahia e ki'i famili ko 'eni' talu mei hono kamata 'a e 'ilo 'oku faingata'a'ia e finemui pea fehangahangai mo e mate' 'o a'u pe eni ki he 'ene pekia.
'I he mamata ki he taa sipinga kuo fokotu'u 'e Siaosi Tupou V kuo toe ulo mai e maama na'e hulu'i pea 'iloa ai a Tonga 'i Mamani katoa 'i he Hilifaki Kalauni 'o e Tu'i Pilitania. Kuo hiki 'e Tupou V e tuhulu (maama) 'o tuku ki he funga puha fuakava pea kuo maamangia a mamani katoa 'o hange koia ne hiki 'e he La'a kuo ungafonua Kuini Salote Tupou 111 'i he'ene fakaha 'ene faka'apa'apa pea tuku e langilangi ki he Tu'i 'o Pilitania' 'i he 'aho 'o hono hilifaki kalauni. 'Oku ongo ki he loto 'o e tangata mo e fefine kotoa pe 'i he fo'i mamani kuo mamata
tonu ki he tutulu 'a 'ene 'Afio Siaosi Tupou V 'i he 'ene fanongo ki he tautapa fie mo'ui 'a e ki'i finemui koia ko Tae Kami.
Ko e ngaahi ma'aimoa 'oku ongoongoa pea tu'uloa 'o ako mei ai a mamani katoa;
Tupou 'Uluaki - Tuku a Tonga ki Langi - "Ko e 'Otua mo Tonga ko hoku Tof'ia."
Kuini Salote Tupou 111 - Na'ane fakamahino neongo 'a 'ene totonu ki he Langilangi 'o e Tu'i, na'ane malava pe ke tukuhifo ia 'o hoko ko e ma'ulalo kae ma'u kotoa pe 'e he Tu'i Pilitania e fakakalangilangi 'o hono 'aho'.
Tupou IV - 'Iloa 'i Mamani kotoa 'a 'ene fakafehokotaki a Tonga moe ngaahi fonua tu'umalie mo malohi fau 'i he tapa kotoa pe 'o e mo'ui fakasivilaise.
Siaosi Tupou V - Na'ane fakamahino'i neongo 'ene Tu'i mo ma'u e Langilangi 'o hono Hilifaki Kalauni na'a ne malava pe ke hifo kihe tu'unaga ma'ulalo taha 'o hange koia na'ane fakahoko 'i he 'ene Ha'ele kia Tae Kami.
Kava Kuo Heka!
Siosiua Moimoiangaha
Joshua [dot] Nehasi [at] AlaskaAir [dot] com