Hilifaki ha tautea mamafa [1]
Sunday, June 29, 2008 - 08:49. Updated on Tuesday, July 28, 2015 - 16:38.
'Etita,
'Oku ou fakamalo lahi ki he 'Eiki Minisita Polisi, Komanita le'ole'o mo 'ene kau polisi pea pehe ki he kakai ne nau fengaue'aki 'o puke mai e kau fiehia ko ena ne nau fai e kaiha'a fakamalohi.
Kou tui 'oku 'ikai ko ha ngaue faingofua ka 'oku ou fakatauange ki he 'Eiki ke kei fakaivia kimoutolu he ngaue 'oku fai kae ongo'i 'e he kakai e fonua 'oku nau malu mo hao.
Kou lave'i ko e toko ua he toko fa ko ena ne puke mai 'o tukuaki'i ne na 'osi fai e hia tatau 'o na ngaue popula ai. Kou tui 'oku tonu ke hilifaki e tautea taupotu taha koe'uhii ke ongo ke 'oua na'a nau toe fai pehe.
Ngali 'oku ma'ama'a e tautea 'oku fa'a 'oange ki he kau faihia, he ko e tokolahi ia 'oku 'ata mai pe 'o toe faihia. Kaekehe ko e me'a ia 'a e fakamaau'anga ka 'oku ou fakatauange ke 'ai ke mamafa e tautea ke nau poto kae tau'ataina e nofo 'a e kakai he sosaietii.
Malo,
Pola Loiti
polaloiti [at] yahoo [dot] co [dot] nz