'Oku tailiili mo hoha'a 'a e kakai [1]
Monday, March 26, 2007 - 20:39. Updated on Friday, May 16, 2014 - 19:52.
Makatu'unga he lahi ngaahi fetu'utaki mai ki he Tau Malu'i Fonua 'a Tonga 'i he loto tailiili mo e hoha'a, hili 'enau fanongoa ki he ngaahi fakamanamana na'e fai 'e 'Akilisi Pohiva 'a ia 'oku 'asi he ngaahi ongoongo mei tu'apule'anga. 'Oku 'oatu ai heni he Tau Malu'i Fonua 'a Tonga 'a e fanongonongo ko 'eni mo e taumu'a ki he nonga moe ma'uma'uluta 'a e nofo 'a e fonua.
Koe fakaloloa ki hono ngaue'aki 'a e ngaahi Lao moe Tu'utu'uni ki he Ngaahi Me'a Fakafokifa 2006 'oku taumu'a ia ki hono tauhi 'a e melino moe ma'uma'uluta 'a e nofo 'a kainga 'i he fonua ni. 'Oku 'oatu ai heni 'a e fakatokanga 'a e Tau Malu'i Fonua 'a Tonga, 'e fakafepaki'i fefeka 'aupito ha fa'ahinga kakai tenau taumu'a ke fakatupu ha moveuveu pe talangata'a ki he Lao 'o e Fonua.
'Oku poupou 'a e Tau Malu'i Fonua ki he Potungaue Polisi ki hono fakafoki 'a e loto tau'ataina ki he kakai 'o e fonua, mei he nofo tailiili moe ilifia hili 'a e ngaahi fakaehaua na'e uesia lahi ai hotau fonua 'i he 'aho 16 'o Novema 2006. 'Oku ngaue fakataha foki 'a e ongo potungaue ko'eni ki hono fakapapau'i 'oku tau'ataina mo malu 'a e fefononga'aki 'a e kakai moe ngaahi ngaue'anga 'i loto Nuku'alofa.
'Oku 'oatu ai heni ha fakamalo ki he kakai 'oku nau tokoni mo poupou mai ki he ngaue ko 'eni 'aki ha'anau telefoni mai mo ha ngaahi fakamatala pea pehe foki ki he kakai 'oku tokoni ke tauhi ke malu honau ngaahi kolo mei he kau fakakina mo faihia. Ko ho'omou poupou 'e tokoni ia ki hono fakafoki ke melino mo ma'uma'uluta hotau fonua telia 'a e kaha'u 'etau fanau. Pule Taumalu'i Fonua 'a Tonga, 23/03/07.