Kau faka'auha 'oku 'ilo'i kimoutolu 'e Sihova [1]
Wednesday, November 22, 2006 - 14:00. Updated on Saturday, March 15, 2014 - 23:04.
'Etita:
'Oku ou kole ke u hufanga 'i he ngaahi talaaofaki kotoa kuo toutou takua atu mei he paenga lafo ni, kae 'ataa 'ae ki'i faingamalie ni ke fai atu ai ha ki'i fakahoha'a kihe faka'auha kuo mau mata'ia. He toki me'a faka'ulia lahi mo'oni 'eni 'a e tu'u hake ha fa'ahinga kakai fakapo'uli pehee ke nau hanga 'o tutu mo faka'auha si'i kolomu'a. Koeha nai 'enau lelei na'e ma'u ai?
Ko e 'asili ai 'etau feinga ke langa hake 'a e ki'i fonua, kuo toe tu'u hake ha fa'ahinga ki'i kakai ia ta'e akonaki'i 'i 'api 'o fai ha ngaahi founga pehe ni. Ko e kakai ko'eni 'oku mahino mai 'oku nau lotu, he 'oku mahino ko kitautolu Tonga kotoa, na'a tau tupu hake 'i he taki taha famili 'oku 'i ai 'a e ki'i potu siasi 'oku tau kau kiai. Mahino 'a e melino, neongo 'a e faingata'a'ia 'a e ki'i fonua, 'oku tau kei tui 'Otua pe mo tauhi ki ai. Ka kuou fu'u 'ohovale 'i he 'eku mata'ia 'a e faka'auha kuo hoko, pea 'ikai ngata ai ka kuo 'i ai mo e mate kuo hoko, 'o 'ikai ko e tokotaha pe, ka ko e toko valu.
Kuo 'osi taimi ke kumi takitaha mai 'a e kau faihia ko'eni pea kau atu mo hano ta'aki mai 'a e kau takimu'a na'a nau fai 'a e fokotu'utu'u ko'eni ki he 'ao 'o e fakamaau'anga pea 'oatu honau tuha takitaha. Ko'eni ha popoaki ki he kau tutu mo e kau faka'auha, 'oua na'a mou pehe te mou lava 'o toi.
Mahalo te mou lava 'o toi mei he mata 'o e tangata, ka he 'ikai te mou lava 'o toitoi mei he Mata 'o e 'Otua. Ko Tonga na'e tuku ki Langi 'ehe 'Uluaki Fa, ko hono kelekele 'oku kona, koe toto 'oe tangata'i Tonga moe fefine'i Tonga 'oku kona. 'Oua na'a ke pehe teke lele pea ke pehe teke hao, koe afi na'e mofia ai 'a e kau pekia, 'okapau na'e 'ikai ko e kaunga faihia, 'e muimui 'a e afi koia 'i ho tu'a pea mo ho hako, kae 'oua kuo hoko mai 'a e 'aho 'o 'ene toe ha'ele mai. Teke pehe 'e tangi 'a e toto 'o e kau pekia ki fe'ia, 'e tangi faka hangatonu pe kia Sihova. He 'ikai teke tamate pea puli, he ko e toto 'o e Tonga 'oku tangi mei he kelekele, he kuo 'osi fakatapui ki Langi.
Fakamalo atu kihe tu'uta mai 'a e konga kau 'a Nu'usila pea mo Australia. He 'ikai masiva tokoni 'a e pule'anga ia mei he ngaahi kaunga'api mei muli ke nau folau mai 'o pukepuke 'a e melino. Ko ho'o mou me'a 'oku fai he 'ikai ma'u ai ha'a mou me'i lelei 'e taha. Takitaha foki ki hono 'api ki he 'ene matu'a pea mou 'alu leva ki ho'o mou faifekau, 'okapau na'e 'ikai kau 'a ho'o faifekau 'au 'i he kau tau toitoi mo e kau faka'auha, fai ha'a mou lotu pea mou 'alu leva 'i he vavetaha ki 'api polisi, ke 'oua na'a muimui 'a e fakamala'ia 'iate koe. He 'ikai tolalo 'a Tonga, 'e kei Tonga pe 'a Tonga pea tu'u he na'e tonu pasika hono 'uluaki fakatapui, na'e 'ikai ke fakatapui kiha 'otua mate, ka ki he
'Otua Mo'ui. Koia ai 'a e Tonga kotoa ke tau lotua mo hufia 'a e Pule'anga Fakatu'i 'o Tonga, mo hono Tu'i, Taufa'ahau Tupou V ne pani 'e Sihova, hono kau Taki 'o e Pule'anga pea pehe ki he kau fakafepaki kuo nau fai 'a e faka'auha pehe.
Faka'apa'apa Atu
Falekolonga He Lotu