Faka'ofa e! [1]
Friday, August 18, 2006 - 08:21. Updated on Friday, September 26, 2014 - 04:06.
'Etita,
'Oku ou kole heni ke ke fakahoko atu ki he kakai 'o Tonga 'a e me'a na'e hoko 'i Tonga na 'i he lolotonga 'a 'eku 'a'ahi atu ki ai he ngaahi uike mai ko e. Ko e me'a koia ko hono "lavaki'i 'e he Fakafofonga Fale Alea, 'Uliti Uata, 'a e kakai 'o Tonga, tautaute-fito ki hono kainga, Kainga 'o Ha'apai, na'a nau fili ia ke hoko ko honau Fakafofonga 'i he Fale Alea. Na'e fai 'a 'eku sio TV he efiafi 'e taha, mo e 'asi mai 'a e fakataha 'a e Fale Alea 'o 'ohake ai 'e he Palemia, Dr. Feleti Sevele, 'oku 'i ai ha taha mei Tonga na'a ne "fakafe'atungia'i" 'a hono teu 'omai 'o e Olovaha fo'ou mei Siapani. Na'e 'ikai teu 'ilo'i pe kohai 'a e tokotaha ko'eni, ka na'aku mahalo'i pe 'a 'Uliti Uata, koe'uhi ko 'ene pisinisi ko e Vaka Uta Pasese. Pea 'i he 'aho hono hoko, na'e tonu pe 'a 'eku mahalo 'i hono fakaha mai 'e he Letio Tonga, ko e tangata koia na'a ne "fakafeatungia'i" 'a hono teu 'omai 'e Olovaha fo'ou ko 'Uliti Uata.
'I he 'eku fanongo pe ki he ongoongo ko'eni, na'e puputu'u lahi 'a 'eku fakakaukau pe au loto mamahi 'i he 'eku fakakaukau loto atu ki hoku kainga Ha'apai, kae 'uma'a foki 'a e toenga 'o e kakai 'o Tonga. Ko e ta'u lahi na' a mau falala ai ki he siana ni, ta ko e 'oku ne lolotonga lavaki'i pe 'e ia kimautolu. Ko e me'a mahu'inga taha pe ka ki ha tangata ka ko e "falala". Ko 'ene mole pe 'a e falala mei ha tangata, kuo hoko pe ia koe "fo'i noa". Ko 'emau fili koia 'a 'Uliti Uata ke ne hoko ko homau Fakafofonga, 'oku hekaheka atu ai ha fatongia mafatukituki, ko 'ene "fai hono lelei taha ke lava ha ngaahi me'a 'e lelei mo 'aonga kia kimautolu mei he fo'i 'one'one", na'a mau fili ia ke hu ki he Fale.
Ko hono mo'oni ko e Aleapau na'e pea 'oku lolotonga hoko 'i he va 'o e kainga Ha'apai pea mo 'Uliti Uata, ke mau fili ia ke 'alu 'o fakafofonga'i kimautolu 'aki 'a e mo'oni pea moe totonu. Ka kuo hoko 'ene "fakafeatungia'i" hono 'omai 'o e Olovaha fo'ou, ko 'ene maumau'i 'a e toputapu 'o e Aleapau koia na'a ne fai mo hono kainga mei Ha'apai. Ko e me'a 'oku hoko ki Ha'apai, 'oku hange ko e fa'a lea fakahua 'a e motu'a mei ho mau motu 'oku pehe, "Faka'ofa e !" Ko e me'a ia 'oku hoko 'i he fakangofua ke pisinisi 'a e kakai ngaue ki he Pule'anga mo e kakai, te nau tauhi 'a e 'Otua 'e 2, te nau 'ofa ki he taha kae fehi'a ki he taha. Kuopau ke fepaki ( conflict of interests) 'e nau fiema'u 'a nautolu pea mo e fiema'u 'a e kakai koia 'oku nau fakafofonga'i.
'I he 'eku tanakitu'unga'i 'a e me'a 'a 'Uliti Uata na'e fai ki hono kainga ko e ta'e'ofa, siokita, pea mo e kaka. Ko e tangata pe 'oku ne ma'u 'a e fo'i tolu ni, te ne hanga 'e ia 'o lavaki'i hono kainga mo'oni. " He really stabbed us on the back " 'o hange ko e lau 'a e kau Papalangi.
Ko e ta'u e 'e fihangofulu mo e to'utangata 'e fiha hono hanga 'e he siana 'o lavaki'i mo takihala'i. 'E 'eke kia hai 'a e fu'u maumau kuo ne fakahoko 'i he lolotonga pea mo e kuohili. Ha'apai, mahalo kuo taimi ke tau fai 'a e lau 'a e kau Papalangi, " It's about time for us to wake up and smell the roses" pea ta'aki e pakopako mei ho tau ngaahi matatahi kae tuku pe ia ke 'one'one 'ata'ata pe ia he 'oku faka'ofo'ofa ange pe ia.
'Oku ou kole heni ke 'oatu mu'a ha'aku ki'i fakamalo tu'a ki he Fakafofonga fo'ou 'o e 'Otu Ha'apai, 'Osaiasi. Koe ta'u 'eni 'e meimei fangofulutupu 'a 'eku tatali ki ha Fakafofonga Fale Alea 'oku ne 'ilo 'ene me'a 'oku totonu ke ne fai 'i he Fale. Ka kuo 'omai koe 'ehe Ta'ehamai ke ke fakahinohino'i kitautolu ki he me'a koia ko e fakafofo-nga'i mo'oni 'a e kakai 'i he Fale Alea. Tu'uma'u 'i ho'o ngaahi kaveinga ngaue, 'ofa pea ke fai totonu ki ho Kainga Ha'apai, ka mau fili ma'u pe 'ia te koe ke ke 'ave ho mau loto pea mo ho mau le'o kia Tupou, ke tokoni mai he 'oku hange ko e lau 'a e Hiva Kakala, "'oku mau nofo pe he fu'u maka, 'oku tahi mei he pea vai mei he". 'Ofa ke tapuekina koe mo ho famili 'ehe 'Otua and keep up the good work!
Faka'apa'apa atu,
Siosaia Fatani.
sstuakoi [at] yahoo [dot] com