Tangata'eiki,

Kataki mu'a kau toe kaunoa atu pe mu'a he ngaahi talanga. 'Oku malie ma'u pe e ngaahi me'a 'oku hoko 'i hotau ki'i fonua pea 'oku fakaoli he taimi 'e ni'ihi. Lolotonga 'eku talitali pe kohai e sulu 'oku fai ki ai e faiva kuo kamata e lavelavea ia 'a e kau 'etifaiva 'o toe veiveiua ange 'eku fakakaukau. Kuo ki'i fuoloa e longo 'a e PSA, ka ko e sekelitali fakataimi pe eni 'oku toe 'aka ki he media. Hange kiate au ko e tokotaha ni 'oku mate kala. Ko e anga 'ete tuli tonuhia kapau na'a ne tonuhia pea kapau na'a te halaia pea 'oku sai ange ke te toi 'o 'oua toe e'a mo toe tolo maka ki he kakai kapau 'oku te nofo falesio'ata. Kaekehe malo kuo ma'u e vahe 'a e kau ngaue lau'aho 'i Ha'apai, 'aee ne ngalo he kau PSA koe'uhii ko 'enau tokanga ki he me'a kehe mei he 'uhinga 'enau 'i ai pea mo'oni e leaa,...."ne hanga ki fe ko sipeiti?. Mahalo ko e me'a mahu'inga taha he uike ni ko e fakamahino 'e he Tu'i Fakamaau lahi ne hala e fo'i fakanafala 'a e kau Talatalaaki ke pehe ne ta'efakalao e huufi falealea. Kau fakafofonga....ko e loea ena ne lahi ai e mo'ua 'a e pule'anga ka mou kei 'oho kui pe....mahalo 'oku mei mate mai e fakafofonga Vava'u ia (Samiu Vaipulu) he kata he 'ohokui 'a e toenga pehe ki he Nopele. Ko e me'a malie heni he ne kole fakamolemole 'a 'Akilisi pea mo 'Uliti pea tali 'e Neti e tu'utu'uni, ka ko e oli he 'oku nau kei tuli tonuhia pe kinautolu mo kole fakamolemole..hange pe 'oku pehe ha me'a. 'I he tafa'aki 'a e pule'anga 'oku kei pulia 'enau toko tolu mahalo 'oku te'eki ai ke nau foki mai mei he hevani hono 7 pea pehe ki he toko tolu he TV 'e taha 'oku nau kei pulia...pau pe koe holomui pe 'o fakamahafu ka nau toe foki mai..pea 'ofa ko ha fo'i me'a fo'ou.

Ko e me'a pe 'oku mahino mai heni, ko e loto ko e me'a faingata'a. Kapau ko e ngaue kotoa 'oku fai'aki e loto lelei 'e si'isi'i e lavea mo e tautolo maka pea 'e lelei e me'a hono kotoa. Kapau ne loto lelei e kau fakafofonga ne nau tali e fale'i fakalao 'a e pule'anga pea ne 'ikai mei fai ha hopo. 'E 'ikai fai ha ofo kapau 'e fai ha 'eke papela 'a e kau loea. Malo kuo lava e hopo pea 'ofa pe 'e ako ai e ni'ihi pea ke ngaue fakataha 'a e pule'anga mo e kakai pehe ki he kau nopele kae lava ke ma'ama'a e koloa ki he kakai, he ko e me'a 'oku tuku e tepile ke ma'ume'atokoni mei ai ha ki'i famili masiva 'oku 'uhinga ai ho'o mou 'i he falee.

malo,

Pola Loiti