Liliu Fakapolitikale [1]
Wednesday, January 18, 2006 - 16:26. Updated on Wednesday, October 1, 2014 - 11:30.
Tangata'eiki,
'Oku ou kole pe ke fakahu atu mu'a 'a e ki'i tohi ni 'i ho'o pepa. Na'a ku fa'a kau he ngaahi talanga lahi he nusipepa "Kalonikali" he ngaahi ta'u hivangofulu tupu, pea ko e lahi taha e ngaahi me'a na'a ku fa'a fakahoha'a ki ai ko hono ngaue 'aki ko ia e laka fakahaha mo e fakahaha loto ke liliu 'aki ha fa'ahinga tu'utu'uni fakapolitikale.
Ko e me'a pe na'a ne fakatupu ko e toe kovi ange 'o e va 'o e hou'eki mo e kakai pea toe va mama'o ai 'a e Fale 'o e Hau 'o Tonga mo hono kakai.
'Oku mahu'inga pe ke 'i ai ha fa'ahi fakaanga ke ne fakapalanisi e mafai, ka 'oku 'ikai ke totonu ke tau nofo 'o fakafa'afa'ahi faka-politikale he'e iku 'o moveuveu ai 'a e nofo fakafonua 'a Tonga, 'oku mau kei polepole ai he'e mau nofo he fonua muli ni, ko e Pule'anga Faka-Tu'i pe 'e taha 'oku kei toe 'i Polinisia.
Kuo 'osi ai e tu'unga kuo a'u ki ai e Fale Alea pea kuo fakanofo 'e he Tu'i ha kau Minisita. Maholo pe kuo taimi ki he kau minisita ko'eni, ke nau fakamo'oni'i ki he Fonua mo 'Ene 'Afio 'oku malava 'a e Tonga ke fakalele 'a e fonua 'i he totonu mo e mo'oni ko e 'ofa fonua mo e mo'ui totoaki.
'I he valungofulu tupu, na'e to folofola ai 'a 'Ene 'Afio ki he mole ko ia 'a e Ngaahi Ngaue'anga 'a e Poate 'a e Ngaahi Koloa, ko e ngaue hala 'a e kau taki 'o e 'aho ko ia.'Oku ou tui 'oku tau fou pe he hala totonu. Kapau 'e lava e kau minisita ko 'eni na'e toki fili 'o fai ha ngaue ke 'omai ai ha tu'umalie ki he fonua 'o Tupou, Hou'eki mo hono Kakai pea malu'i 'a e fonua ke 'oua na'a toe hoko ha fehalaaki 'o hange ki ia na'e hoko ki he Poate 'oe Ngaahi Koloa, mahalo pe kuo taimi ke fili 'e he kakai ha Palemia ke ne fakalele 'a e fonua.
'Oku totonu pe ke 'oua 'e toe fai ha fakafalala ki he kakai Tonga he ngaahi fonua muli he ko 'afe pe kuo mole atu 'a e to'u tangata ia na'a nau kei manatu atu ki Tonga (first generation immigrants) kae tupu hake 'enau fanau (second and third generation immigrants) 'a kinautolu ko e kau muli pea 'ikai leva ke toe 'inasi si'i Tonga he ngaahi monu'ia 'o e laku silini atu ki Tonga.
'Ofa ke kei tu'uloa 'a Tonga ko e fonua Polinisia kei Pule-faka-Tu'i pe 'e taha he Pasifiki.
Faka'apa'apa atu
Vakataha Mila
vakatahamila [at] yahoo [dot] com">vakatahamila [at] yahoo [dot] com [2]