Tau Potalanoa mu'a ke tau Femahino'aki pea toki Fakahoko e Loto Mamahi [1]
Wednesday, January 18, 2006 - 15:53. Updated on Wednesday, October 1, 2014 - 11:32.
'Etita,
Fakatauange ke tau ke tau toe talanoa mu'a ke tau toe femahino'aki pea toki hoko 'a e felafo'aki mo e felotomamahi'aki. 'Oku ou tui foki 'oku 'ikai ke totonu ke tau fu'u loto mamahi 'o fu'u to ki tu'a ke tautea 'e tau kau faiako, 'oku ou fokotu'u atu tau toe ki'i vakavakai lelei ange 'o toe kumi ha fakakaukau 'e lava ke tau ngaue fakataha ai mo si'i kakai ngaue 'aonga ko'eni ke teu'i e kaha'u 'o Tonga. 'Oku fele 'a e ngahi founga 'a e kakai 'oku ngaue he potungaue ako ke nau fakalele'ii 'a e ki'i palopalema ko'eni. He ko hono 'uhinga ia na'e fili ai 'e he pule'anga ke nau fakalele 'a e Potungaue Ako.
Fakamolemole na'a te si'i ngali kaunoa, ka 'oku ou tui fakapapau ko e Potungaue Ako mo e kau faiako 'oku tonu foki ketau tokoni'i 'e ha'a tauhi fanau pea mo e kakai kotoape 'o Tonga ke lava ke fai lelei 'enau ngaue ke teu'i ha kakai ke langa 'a Tonga, mo 'omi ha maama ke lave ai 'a e tangata'i fonua 'o Tonga. He ko e me'a 'oku tau kei felauaki ai he lahi e palopalema (ko e ki'i 'ita hake pe ha ki'i me'a laulaunoa pea lele leva ke hilifaki tautea).
Ko Tonga mo e Potungaue Ako ko e ki'i famil pe (toe fakafoki pe 'a e famili ki lotofale 'o toe fai hano talanoa'i ke vete 'a e palopalema 'oku hoko) kapau kuo lakahala 'a e foha pe ko e 'ofefine ko e ongo matu'a pe te na lava 'o vete 'a e palopalema, mo toe kataki hange ko e 'ofa 'a Kalaisi. (Toe fai pe ha lotu fakafamili ke lahiange mo hano hufia ho tau ki'i fonua/he ko e fonua na'e foaki 'e Tupou I ki 'olunga).
Toe manatu'i ange/tau toe vakavakai'i lelei'i ange he 'ikai toe ha'u ha fonua mei muli 'o 'ofa lahiange 'i Tonga (ko Tonga pe 'e kei 'ofa 'i hono kakai mo hono pule'anga) toe talanoa'i pe ha founga ke vete 'aki 'a e palopalema 'osi ko ia pea toe hoko atu 'a e nofo fe'ofo'ofani mo e teu'i e kaha'u 'o Tonga.
Faka'apa'apa atu.
S.Tupola.