Kau Ngaue Fakapule`anga ko e Huitu`a e Pule`anga [1]
Wednesday, January 18, 2006 - 14:28. Updated on Wednesday, October 1, 2014 - 11:52.
`Etita,
Kuo fuoloa mo e tuku`au mai `a hono ui `a e fa`ahinga `oku nau fakahoko fatongia mo ngaue`i `a e pule`angá ko e kau Ngaue Fakapule`anga pea fa`a faka`aonga`i `i he lea fakapapalangi ko e "Civil Servants" pe ko e kau "Sevaniti Sivile".
Ko e kau Ngaue fakapule`angá ko e huitu`a mo`oni ia `o e Pule`angá he ko kinautolu `oku nau fakahoko ngaue mo fakalele `a e fonuá. Ko e ngaahi nima ia mo e va`e `o e Va`a Pule `o e Pule`angá `i hono fakahoko `a e ngaahi lao kuo paasi `e he Fale Aleá pea `osi fakamo`oni huafa ki ai `Ene `Afió.
Ko e taha `o e ngaahi lao mahu`inga taha `o e Fale Aleá `oku fekau`aki ia mo e ngaahi pa`anga `oku fakangofua ke fakamoleki `e he pule`angá lolotonga `a e ta`ú.
`Oku matu`aki kehekehe `aupito `a e tefito`i fatongia `o e kau ngaue fakapule`angá pea mo e kakai ko ia `oku nau pole`i `a e mala`e `o e politikí. `Oku totonu ke taafataha `a e kau ngaue fakapule`angá ki he ngaue mo e fatongia fakapalofesinale `oku nau fili ke muiá. `Oku totonu ke nau tokoni ki he Va`a Pule `o e Pule`angá `i hono fale`i `a e ngaahi me`a lelei mo fakapalofesinale taha ki he fakalele mo fakahoko `a e fatongia `oku nau fua `i he Pule`angá.
`Oku `i ai `a e fo`ilea falapapalangi ko e "career" `a ia `oku falute ai `a e tefito`i taumu`a mo e kaveinga `o e ngaue fakapule`angá. `Oku hanganaki `a e fai fatongia `i he ngaue fakapule`anga ko hano tulia ha tu`unga fakapalofesinale `a ia `e hokohoko atu `i he taimi `oku loloa `i he mala`e `oku te `i ai.
`Oku hanga `e he fo`ilea "career" `o vahevahe`i ai `a e kau ngaue fakapule`angá mo kinautolu ko ia `oku nau fili ke ngaue `i he mala`e fakapolitikale... `o nau kanititeiti `o fili ki he Fale Aleá pe ngaahi ngaue pe tu`unga `oku fili `e he kakai kinautolu ki ai.
Ko e hokohoko lelei ko ia `a e fakalele mo e fakahoko `o e ngaahi ngaue `a e pule`angá `oku fuatautau leva ia mei he kau ngaue fakapule`anga he ko kinautolu `oku ngaue tu`uma`u. Ko e ngaahi tu`unga fakapolitikale `e feliuliuaki ia `o fakatatau ki he fili `a e kakai.
Kuo fuoloa mai `a e fekolosi`aki `a e ongo fatongiá mo e ongo ngaué `i Tonga ko e `uhinga ko e kau Minisita `oku fakanofo ia `e he Tu`í `o `ikai ke fili `e he kakaí. `Ikai ngata aí, `oku fa`a lahi foki `a e kanititeiti `a e kau ngaue fakapule`anga ia `o fili Fale Alea. `Oku totonu ke fakafisi `aupito `o mavahe `a e tokotaha ngaue fakapule`angá pea ne toki fili ki ha tu`unga fakapolitikale.
Kuopau ke "loyal" pea ke tauhi `a e kau ngaue fakapule`angá ki honau fatongiá ka `ikai `e `ikai leva ke lele lelei `a e pule`angá. `Oku `ikai foki ke totonu ke toe u`u `a e fanau `i he tuhu ko ia `oku ne fafanga ia! Ko e `uhinga ia `oku `ikai ai ke fa`a ngofua `i he meimei pule`anga lahi ki he kau ngaue fakapule`angá ke nau tukungaue pe kau ki he ngaahi me`a fakapolitikale.
Ko e tokotaha ngaue fakapule`angá ko ha sevaniti sivile ia, `a ia ko ha tokotaha kuo poletaki `ene mo`uí ke fai fatongia pea hoko ko e tamaio`eiki mo e kaunanga ma`a e fonuá. `Oku `ikai teitei totonu ke toe sitepu ia ki he tafa`akí `o fai `ene ki`i politiki kae tuku hono fatongia ki he fonuá.
`Oku `ataa `a e tangata Tonga ke fili - ke fili ke sevaniti sivile `o ngaue fakapule`anga - pe ko ha`ane ngaue fakataautaha pe fakapolitikale.
`Oua `e toe fehopokaki holo he siakale!
Teu toki hoko atu.
`Ofa-ki-Tonga
OfaKiTonga [at] comcast [dot] USA