You are here

Talanga 'i he lea faka-Tonga

Na‘e Pekia koaa ‘a e ‘Otua ‘i he Falaite Lelei ?

Nuku'alofa, Tonga

‘I he uike pekia ‘o e ta’u ni na’e ‘ohake ai ‘a e fehu’i pe nae pekia koaa ‘a e ‘Otua ‘i he Falaite Lelei? ‘i he taha ‘o e ngaahi ‘apitanga ‘a e Siasi Uesiliana Tau’ataina ’o Tonga, ke fai kiai ha vahevahe.

Na’e faha’i ua lalahi ‘a e  talangaa ‘a ia ko e kau ‘‘ikai’ mo e kau ‘‘io’, pea na’e ‘ohake ‘a e ngaahi Folofola ke poupou’i ‘aki ‘a e ngaahi ‘uhingaa. Kiate au, ‘oku na fakatou tonu pe he ‘oku ‘i ai pe ‘a teolosia ‘oku fakat-ohitapu (hypostatic union) ‘oku taukavae’i ko Sisu Kalaisi ko e ‘Otua kakato pea toe tangata kakato, pea ‘oku ‘ikai ‘e tuifio (mix).

‘Oku ‘i ai ‘a e tali ‘e ua ki he fehu’ii pea ‘e makatu’unga pe ia ‘i hono faka‘uhinga’i ‘o e fo’i lea ko e ‘mate’. ‘Uluakii, kapau ko e matee ko e mavahe ‘a e laumalie meihe sino, pea ‘e ‘‘io’ leva ‘a e talii koe’uhii ko e tangata kakato ‘a Sisu pea na’e tuku atu ‘e Sisu hono laumalie ki he Tamaii ‘i he ‘ene pekia ‘i he kolosii. Tatau pe mo ‘ene folofola ange ki he taha ‘o e ongo kaiha’a ‘akauu – ‘’i he ‘aho ni (he’ena matee) teta ‘i Palataisi’, ‘a ia, na’e mate ‘a e sino ia ‘o Sisuu. Ko hono uaa, kapau ko e matee ko e ‘osi ‘aupito ‘a e mo’ui faka-e-sino mo e faka-e-laumalie (cessation of existence) pea ko e tali ki ai ‘oku ‘ikai’, ‘a ia’ na’e ‘ikai mate ‘a e laumalie ia ‘o Sisuu, he ko e lau ‘a e Tohitapu na’e toetu’u ‘a Sisu meihe pekia pea liuaki ia ki hevani ‘o ‘afio ‘i he to’omata’u ‘o e Tamai ‘o taukapo’i mo fakatonuhia’i ‘a e kau tui kiate Iaa. Ko e ta sipinga mo e fakataataa ia ki he kau tui mo’onii, he te nau ‘i hevani fakataha mo Ia.      

Kamata ‘i he 1960 tupuu ‘a e teke mai ‘e he kau mataotao faka-teolosia ‘e ni’ihi ‘a e pehee na’e mate ‘aupito pe ‘a Sisu ia faka-e-sino mo faka-e-laumalie, hange pe koha tangata pea na’e ‘ikai toetu’u ia.  Ko e ngaahi fakakaukau ‘eni ia na’e taukave’i lahi mai ‘e he filosefa Siamane ‘iloa ko Friedrich Nietzsche ‘i he senituli 19, kuo mate ‘a e ‘Otuaa pea ‘oku ‘ikai toe ‘i ai ha me’a ia ko e ‘Otua ‘i mamani ‘i he kuonga ni. ‘Aia, ko ’ene taumu’aa ‘oku ‘ikai ke toe ‘i ai ha molale faka-kalisitiane ia ka ko e tangataa pe ‘oku ne fokotu’u mo fa’u ‘ene molale ma’ana, ka ‘oku ‘ikai koha ‘otua. Ko e fa’ahinga fakakaukau tatau ‘eni na’e teke mai ‘e Epicurus, ko e filosefa Kalisi ‘i he senituli tolu kimu’a ‘ia Kalaisii, pea pehee foki kia Charles Darwin ‘o Pilitania ‘i he senituli 19, ‘a ia, ko e senitaa ‘o e me’a kotoa ‘i mamani ko e tangataa pe, pea ko e ‘otuaa ia.   

Ko e ngaahi fakakaukau ni ‘oku manakoa ‘aupito ia ‘e he ni’ihi ‘o ha’a poto, kau hiva mo e kau sitaa hele’uhila ‘iloa koe’uhii he ‘oku nau fa’iteliha pe kia kinautolu ‘o ‘ikai taliui kiha taha mo molale kehe. Ko ‘enau mo’ui ‘i mamanii ke nau ma’u pe ‘a e fiefia lahi taha ‘e malava ‘o ma’uu he ko’ete matee pe ko ’ene ‘osii ia ‘a e me’a kotoa. ‘Ikai toe ‘i ai ha me’a ia ko hevani pe heli pe ko e fakamaau’i kitautolu ‘i he ‘aho fakamuii. ‘Oku ohi ‘ehe ngaahi filosofia kehekehe ‘a e fakakaukau ni kau ai mo e ‘socialism’. Ko e me’a ‘oku fakaloloma tahaa he ko e fo’i loi tatau pe ‘eni na’e too ai ‘a ‘Atama mo ‘Ivi ‘i he ngataa koe’uhii na’e huu tonu atu pe ‘a ’ene fale’i mo e fie ‘otua ‘a e ongo me’a ni ke tatau pe mo e ‘Otua mo’ui, hili koia na’a na ‘osi ‘ilo’i pe tena mate fakatou’osi ‘okapau tena kai ‘a e fua ‘o e ‘akau na’e tapu’ii.  

‘Oku mahu’inga ‘aupito ke tau ‘ilo’i ‘a e ngaahi filosefia mo e ngaahi tokateline fo’ou ‘oku haa mai ‘oku lelei, onopooni mo faka-mamani lahi,  ka tene uesia kovi ai ‘a ‘etau nofo ‘i Tonga ni. Ko e fehu’i mahu’inga tahaa leva ‘oku totonu ke fai ki ai ‘a ‘etau tokangaa pe ‘e ‘alu ‘a hoto laumaliee ki hevani pe ko heli ‘i ha’ate mate. Fakapapau’i ‘i he taimi ni pe te ke ‘alu ki hevani ‘i ha’o tali ‘a Sisu Kalaisi ko ho ‘Eiki mo Fakamo’ui, ‘o fanau’i fo’ou ho’o mo’ui ‘o ke falala kakato kiate Ia, ‘i ho’o kei ma’u ‘a e manavaa. Ko e toki me’a fakaloloma mo’oni ia ‘i ha’o toki ‘ilo’i ‘i ho’o matee taa koee ‘oku ‘i ai pe ‘a e ‘Otua, hevani mo e heli, ka kuo tomui, he te ke hangatonu koe ki heli. Ko e fili ia ’a koe mo au pea ‘oku tau lotu kotoa ke tonu ‘eta filii.

Sione Tu’itupou Fotu

Comments

Ko e misiteli ia ko'eni na'e talu pe 'a e 'aho ne pekia ai 'a Sisu pea mo hono talanga'i. Pea 'e fai pe hono talanga'i 'o a'u kihe 'osi 'a mamani. Tautefito ki he kakai 'oku nau poto ange, kau saianisi, kau palofesa etc. 'oku fai 'enau ngaahi fakamatala, faka'ikai'i, pe faka'io, pea tuku kiai mo 'enau ngaahi fakamo'oni fakapoto mo fakasaianisi pea 'i he sio 'a e kakai ki he ngaahi fakamo'oni koia pea 'oku faingata'a ke tala pe ko e fe 'a e mo'oni meihe ta'e mo'oni. Toki fili leva 'e he tangata takitaha 'a e me'a koia 'oku sai'ia ai 'o tui ki ai. 'I he fonua ni 'oku mape'e 'a e kau sitaa mo e kau hiva tokolahi ki he faha'i koee 'e lava ke fakafiemalie'i honau kakano pea mo 'enau ngaahi holi faka-tevolo kehekehe pea nau tui mo poupou kiai. Ka kumi 'a e mali vete lahitaha 'oku kau ai 'a Holywood. 'Oku 'i ai pe 'a e konisenisi mo'ui ia 'i he tokotaha kotoape, ka 'oku fili pe tokolahi ia ke fakapoongi honau konisenisi mo'ui 'aki 'a e ngaahi me'a 'oku nau fiema'u mo holi kiai, tatau aipe ia pe 'oku kovi pe 'ikai. 'Oku feinga 'a e faha'i 'a e tevolo ke faka'ikai'i kakato 'a Sisu Kalaisi, pea 'e fai pe ia 'o ta'engata .Ka ko e kakano mo e mo'oni 'o e ngaahi akonaki mo e ngaahi ngaue na'e fai 'e Sisu Kalaisi, kapau 'oku mo'ui hotau konisenisi, 'e lava pe ke tau 'ilo 'a e lelei, mo e mo'oni mo e melino tetau ma'u mei ai lolotonga pe 'oku tau kei 'i mamani. Ko e misiteli 'o e pekia mo e toetu'u 'a Sisu 'e talanga'i pe ia 'o ta'engata, ka ko e kakano 'o e mo'ui, ngaahi ngaue mo e ngaahi akonaki 'a Sisu Kalaisi 'oku makatu'unga ai 'eku tui ko Sisu Kalaisi ko e 'alo 'o e 'Otua mo'ui, pea na'ane toetu'u meihe pekia. 'Oku 'i ai 'a e tohi mahalo pe 'oku lave ki he 'topic' ko'eni 'Killing Jesus' 'oku manakoa 'ehe tokolahi 'i mamani, fa'u e Bill O'Reilley.....SAIA

"The central concept of Christianity is that Jesus died on the cross as a final sacrifice to allow his followers to receive it vicariously and thus be washed of sin for entry into heaven. But whereas a sacrifice means losing something permanently, Jesus lost nothing. He came back three days later good as new. So, in effect, there was no sacrifice. However, the larger point to be made is why would a god require a blood sacrifice to forgive people of their sins? It smells suspiciously like something a Medieval mind would concoct, not something from the supreme creator of the universe."