You are here

Talanga 'i he lea faka-Tonga

Ko e paloti ‘a Falealea te ne liliu hono pule’i ‘o e fonua

Nuku'alofa, Tonga

‘Etita,

Na’aku talanoa atu he tohi kimu’a heni (fofola e fala ka tau alea) ki he tala ‘o Filimo’ulie, pea ‘oku kei hoko atu pē e fakatotolo ki he tala ni.

Kau toe ki’i hoko atu pē mu’a e fakatalanoa ki he tūkunga faka-politikale ‘oku ‘i ai e fonua he ‘oku ou tui fakapapau ko e feinga ko eni ke liukava’i e ngaue mo e fa’unga pule na’e maa’imoa kiai ‘a Tupou I ‘oku lolotonga feinga ‘akinautolu ‘oku nau fakakaukau’i e liukava ke fakahoko kamata mei he loto’i Pule’anga ‘o fakatefito ‘i Fale Alea ‘aki e ivi paloti ‘oku nau ma’u ai.

Ko e taumu’a eni ‘o e ngaahi Lao Fakaangaanga ‘oku lolotonga nofo ‘i Falealea ‘o tali ki he foki mai ‘a e Falealea ‘i he mahina ka hokō. ‘Oku ‘ikai teu tui ‘e toe holomui e Pule’anga mei hono fakapaasi e ngaahi Lao Fakaangaanga ko‘eni he ko hono kotoa ke to’o e ngaahi mafai tefito ‘oku ‘i he’ene ‘Afio ki he malu fakalūkufua ‘o e kakai mo e koloa ‘a e fonuā. Neongo ‘oku nau fai honau tukuingata ke faka’ikai’i eni pea fufuu mei he ‘ilo mo e mahino ‘a e kakai e fonua. Ka ‘oku nofo tonu e ngāue ni he founga fakaliukava ne u ‘osi lave kiai “feinga ke nofo e kakai e fonua he tu’unga ‘o e ta’emahino mo e veiveiua ‘aki e loi mo e faka’ikai ‘o hange koia ‘oku lolotonga hokō; pea ko e tokosi’i pē ‘oku nau ‘ilo ki he palani mo e kaveinga ‘o e ngaueni.

Ko e taha e ngaahi Lao Fakaangaanga koeni ko e to’o e mafai ‘o ‘Ene ‘Afio mei hono aofangatuku ha tu’utu’uni fekau’aki mo e kelekelē ki ha ngaahi langa lalahi ‘a e fonuā pea ‘oku pehe ni e anga ‘o e fo’i lao ko enī:

Cabinet seeks royal authority in appointing Planning Tribunal: An urgent bill pushed by the Cabinet last month- the National Spatial Planning And Management (Amendment) Bill 2019- aims to replace the Kings Authority in appointing the ‘Planning Tribunal’ which adjudicates appeals filed by applicants against decisions made by the National Spatial Authority, a body that accesses and approves draft plan of land/development projects” Matangitonga.

‘A ia ko e lao eni ‘oku fihia ai e lisi kelekele ‘eka ‘e 3000 mei Sopu ki Hihifo, pea pehee ki he kelekele ‘o e Kolisi Tonga. Ko e me’a ‘oku malie he ko e fokotu’u mei Kapineti ke fetongi ‘Ene ‘Afio ‘aki e Palesiteni ‘i ha komiti ‘e toki fa’iteliha pe ia ki hono fili hono kau memipa. Ko e fuofua ‘asi eni ‘a e lakanga ko e Palesiteni he talanoa ‘o e liliu-faka-liukava pea ko e mafai lahi faufaua eni kene pule’i e ngaue fekau’aki mo e kelekele/langa fakalakalaka. ‘A ia ‘oku mahino mai ko e founga eni ‘oku fakahoko ‘aki e liukava ko eni:

  1. Ko hono fakahū mai e Palesiteni ki he ngaahi mafai lalahi ‘o ‘Ene ‘Afio.
  2. Ko ‘ene maau ‘o ‘ikai toe ‘i ai ha mafai ‘o ‘Ene ‘Afio, pea kuo maau ke teke’i ki he Fakalangilangi mo e Anga Fakafonua.
  3. Pea ‘e toki talamai leva ki he fonua kuo tau maau ke Lepapilika.

Ka ‘i he lolotonga ni ‘oku fai hono takiaki’i e kakai e fonua ki he fakakau ni he ngaahi polokalama he fungavaka ma’unga ongoongo kehekehe ‘e he kau memipa ‘o e Kapineti. ‘A ia ‘oku ‘ikai fakahā mai ia ke tau liliu ‘o pule’anga Lepapilika ka ‘oku ‘uluaki fkahū mai e Palesiteni ki he ngaahi mafai ‘o ‘Ene ‘Afio pea toki fakahā mai e kaveinga totonu ‘o e liliu mo e liukava ‘oku fakahoko.

Ko e me’a oku faka’ohovale ki he motu’ani ko e fa’ahinga founga ‘oku palani ‘aki e liukava koeni he ‘oku te’eki ai ke u tokanga’i ‘e au ha founga pehē mo maau kuo fakahoko ‘e he kakai koeni ki mu’a. Ko ‘eku fifili, ko hai ‘oku ne fale’i e Kapineti ki he founga koeni ke tukuhifo hotau pule’anga Faka-Tu’i ‘oku kei laukau ‘aki ‘e he Tonga ‘o fakatatau ki he fepotalanoa’aki mo e kakai e fonua ‘i Tonga mo e ‘otu muli he ngaahi ta’u si’I kuo maliu atu.

‘Ofa atu,

' Inoke Fotu Hu’akau