You are here

Talanga 'i he lea faka-Tonga

Malie Hauai'i

Lennox,California, USA

‘Etita,



Ne u kamata ke tule mohe ko e lahi e felafoaki mo e kau tangata talanoa malie mei he vahaope, ko ‘eku toe foki mai’ ko e fanongo ki he tangi halotulotu ‘a e matapule mei Hauai’i M.Tuaileva ‘oku lolotonga ‘alu mo hono famili ‘o ‘eva ki Olenitoo, Foloolita (Orlando Florida). Ko e me’a na’aku fakatumutumu ai ko ‘ene tangi lahi he fu’u ‘ofa pehe ‘o hange ko ‘ene lave ko e ‘ofa ki he matu’a ‘oku fokoutua ‘i Pangai Si’i’.



Tangata M.T, tuku e tangi mo e faka-mamahi kae taa’i e US$100,000.00 ia (Western Union) ‘oku ke maumau taimi ‘aki ‘i he va’inga ‘i Tisini Uelo’ (Disney World) ke kumi ‘aki ha inu mo ha fo’i suluka e matu’a ‘oku kemi ‘i Pangi Si’i’. ‘E fiefia lahi e tu’unga matu’a ni kapau ‘e lava pea ‘oku ou tui lahi tenau matuku ai pe kinautolu ki honau takitaha ‘api he ‘e lato e fiema’u’ pea toe lava pe ‘o totongi mo ‘enau ‘uhila’.

‘Amusia koe MT ‘oku ke ‘eve’eva holo pe he vaha’a ‘o Hauai’i mo Fololita’ he ko e ongo vahefonua ko ‘eni’ ko e kakai ‘eva’eva pe ‘oku nau ‘ahia’ he ‘oku lahi ai e ngaahi faiva fakapolinisia’. Ko e si’i matu’a nofo ‘i Pangai Si’i ‘oku nau pate’i ‘aupito he taame’a lea’ mo e hiva. ‘Oku ou tui teke tokoni lahi ki hano feingai ke nau folau atu mo ha’anau kulupu hiva kakala ki he mataatahi ‘oku ke ‘eva hola ai’.

‘Oku ou fu’u ‘ohovale ‘i ho’o fu’u loto mamahi pehe ki he Fale ‘oe Tu’i, lolotonga koia kuo ke fakamatala mai ho’o kau ‘i he tafa’aki feinga ke fakalakalaka e tu’unga Leipa ‘i ‘Amelika ‘i he ta’u ‘eni ‘e tolungofulu kuo maliu atu’. Ko e ‘aho fakamanatu (Labor Day) ko e fakamanatu ia ‘o e kakai na’a nau ngaue’i e fonua’, ‘oku ‘ikai ko ha fakamanatu ‘o e kakai ‘oku nofo pe he mataatahi’ ‘o sio vaka uta pasese.



Kuo ke toe tu’u ‘o tuhutuhu ki he me’a ke fai ‘e he kau Fakafofonga ‘o e kakai pea kuo ke toe tuhu ke tuku hono vikia ‘o e faifatongia ki he Pule’anga ‘a e Palemia Dr Feleti Sevele’. ‘Oku ou kole atu ke tuku e talanoa tuhutuhu ia he ko e me’a ia ‘a e kau folau tahi, ‘oku ‘ikai kau ai e kau fakateetee loufusi ia ‘i mataatahi.

Kuo ke tu’uaki fakatau ho kelekele tu’u mataatahi ‘i “Palm Springs, California. Ko e feitu’u ko ‘eni ‘oku nofo ai e kau Milionea kuo nau malooloo mei he ‘enau ngaahi ngaue’. ‘Oku ou fokotu’u atu ke ke fakatau atu ha konga kelekele ‘e taha ‘i ho ngaahi ‘api tukuhau koia’ pea foaki ia ma’ae si’i tu’unga matu’a ‘oku fokoutua holo ‘i Pangai Si’i pe ko ho’o fakatau e Shoreline na’a ma’ama’a ange ha’o fakalele e ‘uhila.



‘Oku ou malie ‘ia lahi ‘i ho’o fo’i lea’ “please do not insult our intelligence, do the math). ‘Oku ‘ikai ke toe ‘i ai ha fika faingofua ia ‘e toe laka ange he foaki ki he masiva, ko ia tangata M. Tuaileva tufa ho’o koloa mo ho’o pa’anga ki he masiva mo ho fanga tokoua’ he ko e me’a pe ia ‘e ta’ofi ai e langa ho mafu hange ko ho’o lau’.



Kuo ke toe kaila ke kumi mai e kau taki na’a nau taki e ngaahi laka’ ke nau ha’u ‘o toe fai ha laka fakahaahaa’ ki he Pule’anga’. Ko e ha kuo ke toe ui holo ai kapau ‘oku ke ma’u e lelei kotoa ‘o ‘Amelika? (Hawaii, Florida, Palm Springs, California).

Ko e fakamulituku mai ‘aki ho’o ngaahi fakaanga’ ‘a e hange ha’o faka’aluma’i si’i matu’a PSA ‘osi ho’o tangi halotulotu ho’o ‘ofa ki Pangai Si’i mo e kau kavatonga’. Tangata MT, ko e mahino kiate au ho’o mohe misi’ ko e ‘ai kemau ‘ilo ‘oku ke ‘eva holo pe mo ho famili he ‘aho ‘oku fakamanatu ai e kakai ‘oku nau ngaue’i e fonua’.



Ko e lea ‘a M.Tuaileva,”Labor Day is generally regarded simply as a day of rest and, family getting together including picnics, barbecues, fireworks displays, water activities, and families with school children take it as the last chance to travel before the end of summer, as we are doing here in Florida, Happy Labor Day to all my fellow citizens at Pangai Si’i, we’re with you. One outrage Tongan.”



MT, ko e tu’u he taimi ni ‘oku ke tu’u koe mei he mo’unga ‘o sio hifo ki Pangai Si’i, PSA, PRs pea tala mo ho’o fiefia’ kae ngalo e kamata’anga ho’o talanoa’.



‘Oku ‘oatu e kole ki he kau kavatonga kotoa pe ke mou tokoni mai hono kumi e lalo talo ‘oku toitoi ai e motu’a ko ‘eni ko MT ke vakai’i na’a ‘oku lele hono suka’ ki ‘olunga, Malie Hauai’i’.



Tano’a ‘a Loa’u’

Siosaia Moimoiangaha

siatahi [at] yahoo [dot] com