You are here

Talanga 'i he lea faka-Tonga

Fiema'u ke fakama'a e fonua

USA

‘Etita,

Te u ki’i lave nounou atu pe ki he talanoa ‘oku fai’ pea ‘oku ou poupou foki ki he lave kuo ‘ohake ‘e Sefita, “kuo fuolua ‘a ‘etau pae ‘a e ‘uli’ ki lalo takapau”. Ko e ki’i tanaki ki he fakakaukau ko’eni ko e ta’u eni ‘e tolungofulu ‘a e ‘ave ‘o e kau ‘atamai’ia ‘i he ngaahi sikolasipi ke ako pea foki mai ‘o tafi e lalo fala’. Ko hono maumau ne nau ‘alu kinautolu ‘o ako ‘o poto pea kuo nau foki mai ‘o heka sea pe pea ‘ikai toe manatu’i e fatongia na’e ‘alu ai ke foki mai ‘o ‘uluaki tafi e ‘uli he faliki pea toki heka ki he sea’. Kuo foki mai e tokolahi pea ma’u e faingamalie pea longolongo ai pe ‘o ‘ikai toe fie hifo ki he me’a na’e kamata ai kae loto ia ke kumi ha kau kavatonga ke nau fai e tafi’. Ko e fokotu’u’ ke tau kamata ‘i hono fakama’a e lingi’anga veve ‘i Popua he ko e fakataataa ofi taha ia kuo lave ki ai ‘a Sefita. Kuo laka hake he veua’i senituli ‘a ‘etau fetuku mai e veve ‘oe fonua pea laku ia he fofonga hotau Kolomu’a’ (Nuku’alofa) . Kuopau ketau kamata fakama’a hotau mata ka tau lava ke sio ki he ‘uli’ mo e ngaahi ha’aha’a ‘oe kuohili. ‘Oku fiema’u ke fai ha fakama’a pea ta’aki hake e hulu kuo popo ‘o laui kuonga pea laku ki tu’a kae fetuku atu ha ‘one’one ke kamata ‘aki e ngaue pea fofola e fala ‘o e kau Siaina ‘oku tolonga kae tauhi pe hotau ngaahi lotaha ki he ‘etau ngaahi katoanga faka Tonga’.

Malo ‘aupito e ngaue S. Moimoiangaha

LAX [dot] RAC [dot] Room [at] AlaskaAir [dot] com